Fëmijët poetë të Gjilanit promovojnë krijimtarinë e tyre

Në ambientet e SHFMU “Selami Hallaçi” në Gjilan, u organizua me sukses promovimi i dy përmbledhjeve poetike të krijuara nga nxënësit e klasave të katërta: “Vargje të arta” nga klasa IV/6 nën udhëheqjen e mësueses Florije Sylejmani dhe “Krijimet e ëmbla” nga klasa IV/2, nën kujdesin e mësueses Vlora Shaqiri-Nuhiu.

Në këtë ngjarje të veçantë morën pjesë stafi udhëheqës i shkollës, pedagogia, bibliotekarja, mësimdhënës si dhe vetë nxënësit, të cilët e mbushën sallën me emocion dhe frymë krijuese. Nxënësit prezantuan krijimet e tyre me krenari, duke recituar vargje që pasqyronin ndjeshmëri, dashuri për natyrën, familjen, shkollën dhe ëndrrat e fëmijërisë.

Këto dy botime janë rezultat i një pune të përkushtuar edukative dhe krijuese, ku mësueset kanë ditur të nxisin imagjinatën dhe aftësinë shprehëse të nxënësve, duke i bërë ata autorë të vërtetë që në moshë të hershme.

“Promovimi i këtyre librave dëshmoi edhe një herë se shkolla jonë nuk është vetëm një vend mësimi, por edhe një hapësirë e zhvillimit të talenteve dhe krijimtarisë. Këto përmbledhje poetike do të jenë një kujtim i çmuar për nxënësit dhe një pasuri e re për bibliotekën e shkollës”, ka thënë kështu mësuesja Florije Sylejmani, teksa na ka sjellë këtë informacion dhe foto nga momentet e aktivitetit.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.