Rayan Mustafa, 6-vjeçari i talentuar që shkëlqen mes ngjyrave

Portali Shkollor vijon të promovojë historitë frymëzuese të nxënësve të talentuar nga e gjithë Shqipëria dhe jo vetëm, por kudo ku ka shqiptar. Në hapësirën e dedikuar posaçërisht nxënësve, sot sjellim historinë e një tjetër fëmije që spikat për pasionin dhe dhuntinë e tij në art. Ai është nga Prishtina.

Rayan Mustafa është vetëm 6 vjeç, por talenti dhe pasioni i tij për artin dallohen që në shikim të parë. I rritur mes ngjyrave, telajove dhe aromës së bojërave, Rayani ka pasur fatin të formohet në një ambient ku arti nuk është thjesht profesion, por mënyrë jetese.

Që në moshë shumë të vogël, ai ka kaluar kohë të çmuar në studion e dy prindërve të tij, piktorë të përkushtuar, duke vëzhguar me kureshtje çdo lëvizje të penelit mbi telajo. Mes dritës natyrale që përshkon studion dhe veprave artistike që marrin jetë dita-ditës, lindi edhe dashuria e tij për artin. Për Rayanin, studioja nuk ka qenë vetëm një hapësirë pune, por një botë magjike ku imagjinata nuk njeh kufij.

Talenti i tij shfaqet në mënyrën si ai përdor ngjyrat me guxim dhe ndjeshmëri, duke krijuar vizatime plot jetë, emocion dhe fantazi. Edhe pse i vogël në moshë, ai tregon një ndjenjë të veçantë për harmoninë e ngjyrave dhe për detajin, çka e bën të dalluar mes bashkëmoshatarëve të tij.

Rayan Mustafa po rritet me frymën e artit, i frymëzuar çdo ditë nga puna dhe pasioni i prindërve. Dëshira për t’u marrë me art lindi natyrshëm, si një vazhdim i dashurisë që ai sheh dhe ndjen çdo ditë në familjen e tij. Me përkushtim, mbështetje dhe talentin që tashmë e karakterizon, e ardhmja e tij në botën e artit premton shumë.

Në një moshë kaq të vogël, Rayani është dëshmi se kur pasioni kultivohet me dashuri dhe përkushtim, ai lulëzon bukur dhe herët.

Portali Shkollor do të vijojë të mbështesë dhe të promovojë histori të tilla frymëzuese, duke i dhënë zë dhe hapësirë çdo nxënësi që spikat me talentin dhe ëndrrat e tij.