“Biblioteka e shëndetit tim”, projekti i Mimoza Xhindit, një ndërthurje mes librit dhe mirëqenies personale

Në kuadër të Programit të Trajnimit të Detyrueshëm Përgatitor për Drejtues të IAP, Brezi i VII (tetor 2024 - korrik 2025), u zhvillua dhe u prezantua me sukses projekti final me temë: “Të rrisim dëshirën për librin dhe kujdesin ndaj vetes, përmes ‘Biblioteka e shëndetit tim’”. Ky projekt është konceptuar dhe realizuar nga znj. Mimoza Xhindi, dhe u mbështet profesionalisht nga trajnerja e saj, Prof.as.dr. Joana Lapa.

Ideja e projektit lindi si një domosdoshmëri për të përballuar dy problematika që shfaqeshin dukshëm në shkollën 9-vjeçare “Rexhep Kothere” në Kuman: mungesa e interesit për leximin dhe niveli i ulët i ndërgjegjësimit për shëndetin fizik e mendor. Duke pasur në qendër fëmijën, por duke përfshirë edhe mësuesit, prindërit dhe komunitetin, ky projekt i dha jetë një biblioteke të re në shkollë, të pasuruar me libra për fëmijë, botime shkencore dhe psikologjike, që lidhen me edukimin shëndetësor, stilin e jetesës së shëndetshme, menaxhimin e stresit dhe të ushqyerit të ekuilibruar.

Projekti u prezantua me profesionalizëm dhe transparencë para trajnuesve të Shkollës së Drejtorëve, të cilët, siç pohon vetë autorja e projektit, e ndoqën nga afër, verifikuan çdo hap dhe u shprehën tejet të kënaqur me realizimin e tij, duke u bindur që projekti ishte ndërtuar sipas të gjitha parametrave të kërkuara.

Gjatë zbatimit të projektit, u realizuan një sërë aktivitetesh konkrete dhe me ndikim, si:

krijimi fizik i bibliotekës në ambientet e shkollës,
pasurimi i saj me botime nga shtëpi botuese të njohura dhe autorë lokalë,
stampimi i një vule zyrtare me tematikën e projektit,
krijimi i fletëpalosjeve dhe broshurave sensibilizuese,
organizimi i takimeve me përfaqësues të shëndetësisë dhe AKU-së,
biseda letrare, konkurse për ese dhe poezi, si dhe orë ndërgjegjësuese për stilin e jetesës së shëndetshme.

Gjithashtu, u krijua edhe një libër përshtypjesh, ku pjesëmarrësit dhe vizitorët mund të ndanin mendimet e tyre për impaktin e projektit.

Këto aktivitete nuk mbetën vetëm brenda shkollës. Ato u shtrinë edhe përtej mureve të saj, duke përfshirë drejtorinë e ZVAP Roskovec, përfaqësues të pushtetit vendor, AKU-në, prindër dhe komunitetin lokal, të cilët kontribuan jo vetëm me pjesëmarrje, por edhe me mbështetje konkrete, përfshi dhurimin e librave.

Projekti është shembull i një pune të mirëstrukturuar dhe me ndikim të matshëm, që jo vetëm i përgjigjet nevojave të nxënësve për zhvillim kulturor dhe shëndetësor, por shërben gjithashtu si model për drejtuesit e rinj në sistemin arsimor. Ai përfaqëson më së miri ndërthurjen e vizionit edukativ me angazhimin komunitar, duke treguar se kur ekziston vullneti dhe drejtimi i duhur, çdo shkollë mund të shndërrohet në një hapësirë të gjallë zhvillimi, leximi dhe mirëqenieje.

Në përfundim, projekti “Biblioteka e shëndetit tim” nuk është vetëm një iniciativë që pasuron një institucion shkollor me libra, por është një thirrje e qartë për të ndërgjegjësuar brezat e rinj që leximi dhe kujdesi për veten ecin bashkë dhe janë gurë themeli për një jetë më të mirë, më të shëndetshme dhe më të vetëdijshme.

PROJEKTI

PREZANTIMI I PROJEKTIT