“Biblioteka në klasën time”, një projekt frymëzues nga mësuesja Mimoza Sinani me nxënësit e klasës VIII-B

Një projekt që vendos librin në qendër të jetës shkollore dhe e kthen klasën në një hapësirë të gjallë leximi dhe krijimtarie vjen nga mësuesja Mimoza Sinani, me nxënësit e klasës VIII-B, në lëndën Gjuhë Shqipe, me temë “Biblioteka në klasën time”.

I realizuar në Shkollën e Bashkuar “Ismet Nanushi” Kullë, ky projekt synon të nxisë dashurinë për librin, të zhvillojë aftësitë gjuhësore dhe krijuese të nxënësve, si dhe të forcojë bashkëpunimin përmes punës në grup.

Në dokumentet më poshtë gjeni të plotë plan-projektin në PDF, prezantimin në PowerPoint, si dhe librin e krijuar nga mësuesja dhe nxënësit e saj.

PLAN PROJEKTI

PREZANTIMI I PROJEKTIT

LIBRI

Ndërkohë, një dedikim nga M.Xhindi vlerëson përkushtimin, pasionin dhe rolin frymëzues të mësueses Mimoza Sinani në formimin e një brezi që mendon, krijon dhe ruan identitetin përmes gjuhës shqipe.

Mësuesi si pishtar i identitetit: Shembulli i Mimoza Sinanit

M.Xhindi

Në labirintet e sistemit arsimor, ku shpesh rregullat dhe programet strikte mund të kthehen në pengesa për imagjinatën, shfaqen figura që thyejnë kornizat. Një rast i tillë është ai i mësueses nga Durrësi, Mimoza Sinani, e cila përmes një ore të hapur në lëndën e Gjuhës dhe Letërsisë, dëshmoi se mësuesia nuk është thjesht një profesion, por një mision për të mbrojtur shpirtin e kombit.

Përtej etapave ,shpirti krijues në klasë nga nxënësit nuk ishte thjesht një orë mësimi por vlerat që përcjell kjo mësuese tek e ardhmja e këtij vendi.

Një orë mësimi mund të jetë thjesht një transferim informacioni, por në duart e një mësueseje pasionante, ajo shndërrohet në një platformë shprehjeje. Mësuese Mimoza, duke ndjekur me përpikmëri etapat pedagogjike, nuk u mjaftua me teorinë. Ajo i ftoi nxënësit të bëhen bashkautorë të dijes.

* Esetë i nxitën ata të mendojnë në mënyrë kritike.

* Poezitë u dhanë zë ndjenjave të tyre më të holla.

Ky proces i nxiti fëmijët të kuptojnë se gjuha nuk është një bashkësi rregullash gramatikore, por një mjet i gjallë për të ndërtuar botë.

Gjuha dhe arti si identitet

Mesazhi më i fuqishëm i kësaj ore ishte lidhja e pandashme mes Gjuhës Shqipe dhe identitetit. Në një epokë globalizmi, ku ndikimet e huaja janë të pashmangshme, mësuesja u kujtoi nxënësve se arti që buron nga gjuha amtare është pasaporta jonë në botë.

“Arti dhe Gjuha Shqipe kanë identitet, dhe ky identitet jeni ju," – ky duket të jetë refreni që ka shoqëruar krijimet e atyre nxënësve.

Arsimi që duam

Ky është modeli i arsimit për të cilin ka nevojë Shqipëria e sotme. Ne kemi nevojë për mësues që nuk kërkojnë vetëm përsëritje të tekstit, por që ndezin shkëndijën e krijimtarisë. Mësuesit si Mimoza Sinani janë ata që edukojnë jo vetëm nxënës të mirë, por mbi të gjitha, qytetarë me vetëdije kombëtare dhe shije estetike.

Nëse duam një të ardhme ku brezat e rinj e duan vendin dhe gjuhën e tyre, duhet të mbështesim këtë lloj arsimimi. Puna e mësueses nga Durrësi është një dëshmi se kur arti dhe shkolla bashkohen, rezultati është një brez që di të krijojë, të respektojë rrënjët dhe të aspirojë lartësinë. Ky, padyshim, është arsimi që duam!