Matura Shtetërore 2026, rregullorja zyrtare, datat e provimeve dhe testet model për maturantët

Është bërë publike rregullorja zyrtare e Maturës Shtetërore 2026, së bashku me kalendarin e provimeve për të gjithë nxënësit që ndjekin arsimin e mesëm të përgjithshëm dhe atë profesional. Dokumentet janë publikuar nga Ministria e Arsimit dhe Sportit dhe përcaktojnë qartë mënyrën e zhvillimit të procesit, detyrimet e maturantëve, si dhe masat ndëshkuese në rast shkeljeje.

Datat zyrtare të provimeve të Maturës 2026

Sipas kalendarit të miratuar, provimet do të zhvillohen në këto data:

2 qershor 2026 – Provimi i gjuhës së huaj

9 qershor 2026 – Provimi i gjuhës shqipe dhe letërsisë

16 qershor 2026 – Provimi i matematikës

23 qershor 2026 – Provimi me zgjedhje

Këto provime janë vendimtare për përmbylljen e arsimit të mesëm dhe për vijimin e studimeve të larta.

Testet model, një ndihmë për përgatitjen e maturantëve

Bashkë me rregulloren dhe kalendarin, janë publikuar edhe testet model orientuese, të cilat u vihen në dispozicion maturantëve për t’i ndihmuar gjatë përgatitjes. Këto teste shërbejnë si një udhërrëfyes praktik për strukturën e provimeve, nivelin e kërkesave dhe mënyrën e vlerësimit.

Mësuesit dhe nxënësit ftohen t’i përdorin këto materiale si pjesë të përgatitjes sistematike për provimet e qershorit.

Kujdes ndaj rregullores dhe penalizimeve

Rregullorja e Maturës 2026 parashikon qartë se çdo shkelje e rregullave të provimit sjell penalizime, që mund të variojnë nga anulimi i testit deri në përjashtime më të rënda nga procesi i Maturës. Përdorimi i mjeteve të ndaluara, komunikimi gjatë provimit apo çdo tentativë për kopjim trajtohen sipas dispozitave ligjore në fuqi.

Për këtë arsye, institucionet arsimore dhe maturantët këshillohen të njihen mirë me rregulloren dhe ta zbatojnë atë me korrektësi.

Dokumentet zyrtare për Maturën Shtetërore 2026 nga Ministrisa Arsimit i gjeni më poshtë në PDF.