Norvegjia ndalon përdorimin e AI-së në shkollat fillore

Norvegjia po vendos kufizime të reja për përdorimin e Inteligjencës Artificiale në shkolla. Nxënësit 6-13 vjeç nuk do të lejohen ta përdorin, ndërsa adoleshentët vetëm nën mbikëqyrjen e mësuesve. Vendimi ka hapur një debat global mbi balancën mes teknologjisë dhe zhvillimit të aftësive bazë te fëmijët.

Norvegjia po vendos kufizime të forta për përdorimin e Inteligjencës Artificiale në shkolla, duke u bërë një nga vendet e para që ndërmerr një hap të tillë në arsimin fillor.

Duke nisur nga fundi i muajit gusht, nxënësit nga mosha 6 deri në 13 vjeç nuk do të lejohen të përdorin mjete të inteligjencës artificiale gjatë procesit mësimor. Ndërkohë, adoleshentët nga 14 deri në 16 vjeç do të mund t’i përdorin ato vetëm nën mbikëqyrjen e drejtpërdrejtë të mësuesve.

Kryeministri norvegjez Jonas Gahr Støre argumenton se përdorimi i AI-së nga fëmijët e vegjël mund të rrisë rrezikun që ata të humbasin hapa të rëndësishëm në zhvillimin e tyre arsimor. “Gjëja më e rëndësishme në shkollë është që fëmijët tanë të mësojnë të lexojnë, të shkruajnë dhe të bëjnë matematikë,” tha ai.

Për nxënësit më të rritur, nga 17 deri në 19 vjeç, qasja do të jetë ndryshe. Ata do të mësojnë si ta përdorin Inteligjencën Artificiale në mënyrë të përshtatshme, me qëllim përgatitjen për arsimin e lartë dhe tregun e punës. Qeveria norvegjeze pritet gjithashtu të propozojë legjislacion të ri që synon të forcojë përdorimin e librave në klasë dhe të rikthejë më shumë vëmendje te metodat tradicionale të të nxënit.

Ky vendim vjen pas ndalimit të telefonave inteligjentë në shkollat norvegjeze, një masë që, sipas disa studimeve, ka sjellë rezultate pozitive, përfshirë nota më të larta dhe më pak vizita te specialistët e shëndetit mendor, veçanërisht mes vajzave. Debati mbi rolin e Inteligjencës Artificiale në arsim po zhvillohet në shumë vende të botës. Ndërsa disa e shohin AI-në si një mjet që mund të ndihmojë mësimin e personalizuar, të tjerë paralajmërojnë se përdorimi i hershëm i saj mund të ndikojë negativisht në zhvillimin e aftësive njohëse, sociale dhe të të menduarit kritik te fëmijët.

Në SHBA, një numër gjithnjë e më i madh prindërish dhe mësuesish po kërkojnë kufizime të ngjashme për përdorimin e AI-së në shkolla. Disa grupe qytetare kanë bërë thirrje për një moratorium dyvjeçar mbi përdorimin e inteligjencës artificiale gjeneruese në shkollat publike të New York-ut. Vendimi i Norvegjisë pritet të nxisë më tej debatin global mbi kufijtë e përdorimit të AI-së në arsim dhe mbi mënyrën se si shkollat duhet të balancojnë teknologjinë me zhvillimin bazë të fëmijëve.