Digjitalizimi

E-matura, Statovci Demaj në Shkollën e Gjelbër në Prishtinë

Statovci Demaj: Projekti i digjitalizimit në sistemin arsimor është ndër projektet më madhore, të cilat po implementohen nga MAShT

Zëvendësministrja e Arsimit, Shkencës dhe Teknologjisë, znj. Anila Statovci Demaj ka vizituar sot Shkollën e Gjelbër në Prishtinë për të parë nga afër pilotimin e Maturës Digjitale “e-Matura”.

Pasi që ka biseduar me nxënësit, të cilët kanë qenë pjesë e pilotimit të Maturës Digjitale, zv/ministrja Statovci Demaj ka theksuar se, projekti i digjitalizimit në sistemin arsimor është ndër projektet më madhore, të cilat po implementohen nga MAShT.

“Digjitalizimi është domosdoshmëri në botën digjitale dhe në hap me këtë ka shkuar edhe Ministria e Arsimit”, theksoi zv/ministrja, e cila përmendi faktin se Projekti i digjitalizimit përmbanë dy komponenta: e-platforma dhe matura digjitale (e-matura).

Duke folur për këto dy komponenta, zv/ministrja StatovciDemaj tha se synimi është që platforma “e-Edukimi” të shtrihet në të gjitha shkollat e vendit, ndërsa sa i përket Maturës Digjitale, ajo theksoi se kjo Maturë është një fazë e avancuar, e cila eliminon shumë probleme, të cilat janë shfaqur në këtë proces gjatë viteve të kaluara. 

“Është shumë më transparent, eliminohen mundësitë e keqpërdorimeve të ndryshme dhe rezultate më të sakta”, tha zv/ministrja e Arsimit dhe theksoi se baza e të dhënave e Maturës Digjitale gjeneron test individual për nxënësit.

Sipas planifikimit të MAShT, Matura Digjitale, në këtë fazë, do të pilotohet në nëntë shkolla, përkatësisht në shtatë komuna.

1,740 Lexime
8 vjet më parë