Një kartolinë urimi për të gjithë mësuesit nga Dritan Staro

Një kartolinë urimi për të gjithë mësuesit

(7 Marsi, festa e vlerësuar,e gjykuar, e mësuesit )

Dritan STARO 07.03.2026

Që nga 7 Marsi I 1887, kur u hap shkolla e parë shqipe dhe kur zë fill festa kombëtare e Mësuesit kanë kaluar vite. Ajo është festuar dhe vazhdon të festohet nga nxënësit dhe mësuesit anembanë vendit.

Në traditën e festës nxënësit u japin lule mësuesve të tyre, si shenjë urimi për festën. Kjo traditë vazhdoi deri në vitet 90.

Më vonë, si kudo, gjërat ndryshuan. Sot 7 Marsi festohet ndryshe. Mësuesit dhe nxënësit bëjnë aktivitete në kuadër të festes dhe jo vetëm, ata gostitin nxënësit, por dhe këta të fundit u bëjnë dhurata të ndryshme. Në fakt nuk ka ndonjë gjë të keqe. Dhuratat e nxënësve, nënkupto, të prindërve, janë të ndryshme si lule, veshje, bizhuteri, zbukurime etj.

Në fakt këto dhurata, bëhen sebep që mësuesit, të gjykohen herë-herë për mirë, herë-herë për keq. Ndoshta në këtë ditë të shënuar të tyre, opinioni merret më shumë me ta. Në vend që të lartësohet figura e mësuesit, apo të mendohet për stimulimin material, dëgjon vogëlsira.

Personalisht nuk jam kundër kësaj mënyre të organizimit të festës së mësuesit, pavarësisht gjykimeve.

Asnjë mësues, jo të gjithë, flas për plejaden e përkushtuar të mësuesve, nuk ua kërkon fëmijëve apo prindërve të tyre dhuratat.

Sidoqoftë, unë flas si prind që kam fëmijët në shkollë dhe si mësues njëkohësisht. Askush nga mësuesit e fëmijëve të mi, nuk më ka kërkuar që unë të detyrohem t'u dhuroj për festë diçka. Ajo që për mua është shqetësuese është se në këtë ditë mund të lexosh a të dëgjosh, nga njerëz të ndryshëm, bile dhe nga figura, komente e fjalë denigruese për mësuesit e fëmijëve të tyre.

Në këtë ditë të shënuar të tyre, ne duhet të falënderojmë mësuesit për misionin kombëtar që ata kanë mbi supe për edukimin e brezit të ri.

Ndaj sot, u uroj atyre gëzuar festën, më shumë përkushtim e përgjegjësi profesionale në punën e tyre .E mbyll me një thënje të Andre Brenton, për arsimin dhe mësuesin :

"Arsimi është të zgjedhësh rrugën e vështirë të dinjitetit, të vetmisë dhe në të njëjtën kohë të digjesh brenda vetes për të mirën e përbashkët, për të bukurën dhe shpëtimin e saj".