Pezullohet mësuesja në shkollën “Isa Boletini” pas transmetimit në emisionin “Stop”, nis hetimi institucional

Pas transmetimit të një materiali investigativ në emisionin Stop, ku pasqyrohej një sjellje e papërshtatshme nga një mësuese e arsimit fillor në shkollën Shkolla 9-vjeçare “Isa Boletini”, ka reaguar menjëherë Ministria e Arsimit dhe Sportit, duke dënuar çdo veprim që cenon sigurinë, mirëqenien dhe dinjitetin e nxënësve.

Sipas njoftimit zyrtar, menjëherë pas publikimit të rastit, Drejtoria Rajonale e Arsimit Parauniversitar Tiranë ka ngritur një grup pune për ndjekjen e plotë të situatës. Janë zhvilluar takime me drejtuesit e institucionit arsimor, psikologët e shkollës dhe prindërit e nxënësve të përfshirë.

Me vendim të datës 6 maj 2026, mësuesja në fjalë është pezulluar menjëherë nga detyra dhe i është ndaluar hyrja në ambientet e shkollës deri në përfundim të procedurave administrative dhe institucionale. Paralelisht, drejtoria e shkollës ka nisur procedurat për kallëzim pranë organeve kompetente, ndërsa do t’i kërkohet zyrtarisht emisionit “Stop” vënia në dispozicion e të gjitha pamjeve filmike për verifikim të plotë të rastit.

Ministria thekson se: "figura e mësuesit mbetet themel i edukimit dhe formimit të brezave të rinj, ndaj çdo sjellje që bie ndesh me etikën profesionale dhe normat njerëzore është e papranueshme dhe nuk mund të ketë vend në sistemin arsimor".

Në reagim vlerësohet edhe roli i medias në evidentimin e rasteve problematike, duke e konsideruar atë një partner të rëndësishëm si në promovimin e modeleve pozitive, ashtu edhe në identifikimin e rasteve që kërkojnë ndërhyrje institucionale.

Ministria e Arsimit rithekson angazhimin për garantimin e një mjedisi të sigurt dhe edukues për çdo nxënës, si dhe për mbështetjen e figurës së mësuesve të përkushtuar. Ndërkohë, grupi i punës vijon mbledhjen dhe verifikimin e të dhënave, ndërsa në përfundim do të hartohet raporti përkatës mbi përgjegjësitë institucionale, në përputhje me legjislacionin në fuqi.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.