Struktura e vitit shkollor 2025–2026, datat e mësimit, pushimeve dhe provimeve përcaktohen zyrtarisht

Urdhri i përbashkët “Për miratimin e strukturës së vitit shkollor 2025–2026 në sistemin arsimor parauniversitar”, i bazuar në Kushtetutën dhe në legjislacionin në fuqi për arsimin parauniversitar dhe atë profesional, përcakton me saktësi kalendarin mësimor, periudhat e pushimeve dhe datat e provimeve për nxënësit e arsimit bazë, të mesëm të lartë dhe profesional. 

Në arsimin bazë, viti shkollor nis më 8 shtator 2025 dhe përfundon më 12 qershor 2026. Nxënësit do të kenë dy periudha pushimesh gjatë vitit: pushimet dimërore do të jenë nga 22 dhjetor 2025 deri më 2 janar 2026, ndërsa pushimet pranverore janë caktuar nga 30 mars deri më 3 prill 2026. 

Provimet kombëtare për përfundimin e arsimit bazë do të zhvillohen në periudhën 15–26 qershor 2026, duke shënuar një etapë të rëndësishme për orientimin e mëtejshëm të nxënësve në ciklin e mesëm.

Në arsimin e mesëm të lartë, mësimet për të gjithë nxënësit fillojnë po ashtu më 8 shtator 2025 dhe përfundojnë më 12 qershor 2026, me përjashtim të maturantëve, për të cilët mësimi përfundon më herët, më 29 maj 2026. Edhe në këtë nivel, pushimet dimërore janë të unifikuara nga 22 dhjetor deri më 2 janar. 

Provimet e Maturës Shtetërore, që shënojnë përmbylljen e ciklit të mesëm të lartë dhe hapin rrugën drejt arsimit të lartë apo tregut të punës, do të zhvillohen gjatë gjithë muajit qershor, nga data 1 deri më 26 qershor 2026. Në arsimin profesional, struktura paraqitet më e detajuar për shkak të larmisë së programeve dhe moduleve të ndjekura.

Mësimi nis më 8 shtator 2025 për të gjithë nxënësit. Për klasat e 10-ta në të gjitha strukturat, klasat e 12-ta në strukturën 2+2 dhe për klasat e 11-ta dhe 12-ta në strukturën 4- vjeçare, viti përfundon më 12 qershor 2026. Ndërkohë, për klasat e 11-ta dhe 12-ta në strukturën 2+1+1 dhe klasat e 11-ta në strukturën 2+2, mësimi përfundon më 29 maj 2026. Për nxënësit maturantë të këtij cikli, mësimi përfundon më 15 maj 2026, duke u lënë vend përgatitjeve për provime. Pushimet dimërore në arsimin profesional janë të njëjta me nivelet e tjera: nga 22 dhjetor 2025 deri më 2 janar 2026. Provimet përfundimtare për kualifikimet profesionale të niveleve II dhe III të Kornizës Shqiptare të Kualifikimeve (KSHK) do të zhvillohen nga 1 deri më 12 qershor 2026.

Ndërsa për praktikën profesionale të kualifikimeve të nivelit IV, provimet do të mbahen nga 25 deri më 29 maj 2026. Maturantët e këtij cikli do të hyjnë në provimet e Maturës Shtetërore Profesionale në të njëjtat data me gjimnazistët: nga 1 deri më 26 qershor.

Ky urdhër i përbashkët vjen si një dokument standardizues për të gjithë sistemin arsimor parauniversitar, duke përcaktuar qartë detyrimet për institucionet publike dhe private në vend. Struktura e parashikuar synon të sigurojë organizim efikas të procesit mësimor, përgatitje të qëndrueshme për provime dhe shpërndarje të balancuar të periudhave të pushimeve.

“Ngarkohen për zbatimin e këtij urdhri, Ministria e Arsimit dhe Sportit, Ministria e Ekonomisë, Kulturës dhe Inovacionit, Qendra e Shërbimeve Arsimore, Agjencia Kombëtare e Arsimit, Formimit Profesional dhe Kualifikimeve, Agjencia Kombëtare e Arsimit Parauniversitar, drejtoritë rajonale të arsimit parauniversitar, zyrat vendore të arsimit parauniversitar dhe të gjitha institucionet arsimore të sistemit arsimor parauniversitar. Ky urdhër hyn në fuqi menjëherë dhe botohet në Fletoren Zyrtare”, – thuhet në udhëzim.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.