Universiteti i Mjekësisë ul pragun e notës mesatare për pranim, publikohen kriteret për vitin akademik 2026-2027

Senati Akademik i Universitetit të Mjekësisë, Tiranë, ka miratuar kriteret e pranimit për kandidatët që do të aplikojnë në programet e ciklit të parë (Bachelor) dhe programet e integruara të studimit të ciklit të dytë për vitin akademik 2026-2027.

Sipas vendimit, kandidatët që aplikojnë në Universitetin e Mjekësisë duhet të plotësojnë notën mesatare minimale, e cila llogaritet si mesatarja aritmetike e thjeshtë e notave përfundimtare të të gjitha viteve të arsimit të mesëm të lartë dhe mesatarja e provimeve të Maturës Shtetërore.

Notat mesatare minimale sipas programeve

Për programet e studimit janë përcaktuar këto nota minimale:

Mjekësi e Përgjithshme ≥ 8

Farmaci ≥ 8

Stomatologji ≥ 8

Shëndet Publik ≥ 7

Infermieri e Përgjithshme ≥ 7

Fizioterapi ≥ 7

Mami ≥ 7

Teknikë Imazherie ≥ 7

Teknikë Laboratori ≥ 7

Logopedi ≥ 7

Teknikë Dentare ≥ 7

Higjenist Dentar ≥ 7

Krahasuar me kriteret e pranimit të një viti më parë, Universiteti i Mjekësisë ka ulur pragun minimal të notës mesatare për pothuajse të gjitha programet e studimit. Ndryshimi është më i dukshëm në programet "Mjekësi e Përgjithshme", "Farmaci" dhe "Stomatologji", ku nota minimale ka zbritur nga ≥ 8.5 në ≥ 8, ndërsa për shumicën e programeve të Fakultetit të Shkencave Mjekësore Teknike pragu ka kaluar nga ≥ 7.5 ose ≥ 8 në ≥ 7.

Si do të bëhet vlerësimi?

Për programin "Mjekësi e Përgjithshme", renditja e kandidatëve do të bazohet në dy komponentë:

• 70% pikët e fituara nga arsimi i mesëm i lartë;
• 30% pikët e fituara në testimin e informatizuar, i cili zhvillohet posaçërisht për këtë program studimi.
• Brenda 70% të pikëve nga arsimi i mesëm përfshihen:
• 35% nota mesatare e të gjitha viteve të shkollës së mesme;
• 15% notat përfundimtare në klasën e 12-të në Fizikë, Biologji dhe Kimi (nga 5% secila);
• 50% mesatarja e provimeve të Maturës Shtetërore.

Nëse kandidati ka zgjedhur si provim me zgjedhje Biologjinë, Kiminë ose Fizikën, nota e këtij provimi shumëzohet me koeficientin 1.5, ndërsa për lëndët e tjera zbatohet koeficienti 1.

Kriteret për Farmaci, Stomatologji dhe programet Bachelor

Për programet Farmaci, Stomatologji dhe të gjitha programet Bachelor të Universitetit të Mjekësisë, nuk parashikohet testim i informatizuar.

Vlerësimi i kandidatëve do të bazohet në:

• 35% notën mesatare të arsimit të mesëm;
• 15% notat në Fizikë, Biologji dhe Kimi në klasën e 12-të;
• 50% rezultatet e provimeve të Maturës Shtetërore, me të njëjtin koeficient 1.5 për lëndët Biologji, Kimi dhe Fizikë si provim me zgjedhje.

Në procesin e renditjes do të merret në konsideratë edhe koeficienti i llojit të shkollës së mesme të përfunduar nga kandidati, sipas tabelës së përcaktuar në vendim.

Vendimi ka hyrë në fuqi menjëherë dhe do të zbatohet për pranimin e studentëve në Universitetin e Mjekësisë, Tiranë, për vitin akademik 2026-2027.

Nga Matura te universiteti, procedurat që presin kandidatët për Mjekësi

Për maturantët që synojnë të ndjekin studimet në Universitetin e Mjekësisë, Tiranë, procesi i aplikimit do të vijojë sipas kalendarit të procedurave për Maturën Shtetërore dhe aplikimeve në institucionet e arsimit të lartë. Kandidatët që do të zgjedhin programin “Mjekësi e Përgjithshme” duhet të kenë parasysh se, përveç rezultateve të shkollës së mesme dhe Maturës Shtetërore, do t’i nënshtrohen edhe testimit të informatizuar, pikët e të cilit përbëjnë 30% të vlerësimit përfundimtar. 

Data e zhvillimit të këtij testi do të bëhet publike nga Universiteti i Mjekësisë në bashkëpunim me Qendrën e Shërbimeve Arsimore. 

Ndërkohë, maturantët duhet të ndjekin me kujdes afatet e aplikimeve dhe procedurave të Maturës Shtetërore 2026, përfshirë provimet kombëtare dhe zgjedhjen e lëndëve që mund të ndikojnë në rezultatin përfundimtar për pranimin në degët e preferuara.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.