Katër libra që i kthejnë fëmijët në heronj të mjedisit

Si t’i mësojmë fëmijët të duan dhe të mbrojnë planetin? Katër libra të serisë “Të kujdesemi për planetin tonë” i kthejnë të vegjlit në heronj të mjedisit përmes lojërave, eksperimenteve dhe këshillave praktike për ajrin, ujin, mbeturinat dhe energjinë. Një hap i vogël sot, për një Tokë më të pastër nesër.

Nga Xhoina Salaj

Sot, më shumë se kurrë, përballja me sfidat mjedisore kërkon një qasje të re që nis që në fëmijërinë e hershme. Por, si mund t’u flasim fëmijëve për tema kaq komplekse si ndotja, burimet e kufizuara apo energjia e ripërtërishme, pa i trembur dhe pa i mërzitur? Përgjigjja qëndron te thjeshtësia, ndërveprimi dhe argëtimi.

Seria e jashtëzakonshme “Të kujdesemi për planetin tonë” është ndërtuar pikërisht mbi këtë filozofi. Përmes onomatopeve goditëse që tërheqin menjëherë vëmendjen (si Fiuu, Plluq, Yfff apo Klik), ilustrimeve të gjalla dhe një gjuhe plotësisht të përshtatshme për moshën, këta libra i ndihmojnë fëmijët të kuptojnë një të vërtetë të madhe: burimet e Tokës janë të kufizuara, mjaft të çmuara dhe mbrojtja e tyre është në duart tona.

Çfarë e bën këtë seri unike dhe praktike?

Ndryshe nga librat e thjeshtë me tregime, kjo seri funksionon si një udhërrëfyes ndërveprues për të gjithë familjen, duke përmbajtur në çdo titull:

4 faqe me veprimtari praktike: lojëra, eksperimente të thjeshta dhe aktivitete që fëmijët mund t’i realizojnë vetë ose me ndihmën e prindërve, duke i kthyer njohuritë teorike në veprime konkrete.
Udhëzues të detajuar për prindërit: këshilla të vyera se si ta përdorin informacionin e librit në jetën e përditshme, duke nxitur diskutime dhe duke i bërë fëmijët plotësisht të vetëdijshëm për misionin e mbrojtjes së planetit.

Pse duhet ta keni këtë seri në shtëpi?

Këta libra krijojnë për të vegjlit një urë lidhëse midis ndërgjegjësimit dhe veprimit. Janë një mjet i shkëlqyer për prindërit dhe mësuesit që duan të rrisin një brez të ri të kujdesshëm, të përgjegjshëm dhe të dashuruar me natyrën.

Fiuu! Ajri

Ajri është i padukshëm, por pa të nuk do të kishte jetë. Ky libër u shpjegon fëmijëve se çdo gjallesë, që nga njerëzit, te kafshët dhe bimët më të vogla, ka nevojë absolute për ajër të pastër për të marrë frymë dhe për t’u zhvilluar.

Çfarë mësojnë fëmijët: libri trajton në mënyrë të kuptueshme rreziqet e mëdha që vijnë nga ndotja e ajrit (nga makinat, fabrikat apo tymi). Por më e rëndësishmja, ai i pajis të vegjlit me idenë optimiste se secili prej tyre, përmes veprimeve të vogla të përditshme, mund të japë një kontribut të vyer për të pakësuar këtë ndotje dhe për të mbajtur qiellin të pastër.

Plluq! Uji

Uji është një nga pasuritë më të mëdha të natyrës, por shpesh ne e marrim si të mirëqenë. Ky libër hap një dritare për ciklin e ujit dhe rëndësinë e tij jetike për çdo gjallesë në planet.

Çfarë mësojnë fëmijët: ata do të kuptojnë se uji nuk është i pashtershëm dhe se ruajtja e tij kërkon vëmendjen e të gjithëve. Libri vjen si një udhërrëfyes jashtëzakonisht praktik, duke u treguar fëmijëve hapa konkretë se si mund ta kursejnë ujin në shtëpitë e tyre (si p.sh. mbyllja e rubinetit gjatë larjes së dhëmbëve), duke i kthyer ata në rojtarë të vegjël të ujit.

Yfff! Mbeturinat

Hedhja e mbeturinave në vendet e gabuara jo vetëm që është një veprim i gabuar dhe problem estetik, por edhe një rrezik i vërtetë për të gjithë. Ky libër trajton një nga çështjet më të prekshme të mjedisit tonë të përditshëm.

Çfarë mësojnë fëmijët: libri tregon se si plehrat dhe mbetjet e tjera krijojnë një mjedis të pakëndshëm dhe, mbi të gjitha, se si ato rrezikojnë drejtpërdrejt shëndetin tonë dhe të kafshëve që na rrethojnë. Përmes këtij libri, fëmijët mësojnë rëndësinë e madhe të hedhjes së mbeturinave vetëm në vendet e caktuara dhe kultivojnë ndjenjën e përgjegjësisë për ta mbajtur pastër lagjen, shkollën dhe natyrën.

Klik! Energjia

Energjia është kudo rreth nesh, por nga vjen ajo dhe si funksionon? Ky libër merr një koncept disi abstrakt dhe e bën plotësisht të kapshëm për mendjen e fëmijëve.

Çfarë mësojnë fëmijët: do të zbulojnë se si e gjithë energjia në Tokë e ka zanafillën - drejtpërdrejt ose tërthorazi - nga fuqia e jashtëzakonshme e diellit. Libri i njeh fëmijët me konceptin e burimeve të ripërtërishme të energjisë dhe u shpjegon pse gjetja dhe përdorimi i tyre është zgjidhja e duhur për të mos dëmtuar planetin, duke i nxitur të fikin dritat dhe pajisjet kur nuk i përdorin.