EURO 2016

Ndeshje historike!

Në minutën e '43 pas një krosimi nga Ledjan Memushaj ishte Armando Sadiku që e ktheu krosimin në një gol historik për kombin tonë. Goli i parë për kombëtaren Shqiptare në një kompeticion aq të rëndësishëm mban emrin e elbasanasit.

Ndeshje historike! Ky është përcaktimi më i saktë për ndeshjen e fundit në grupin A për kombëtaren Shqiptare në kampionatin europian EURO 2016, që po zhvillohet në Francë. Shqipëria shënoi golin e parë dhe fitoi mbrëmë, jo vetëm ndeshjen e parë në një kompeticion ndërkombëtar, por edhe zemrat e gjithë botës së futbollit.

Pas ndeshjes në Stadiumin e Lyon, në fundin e mbrëmjës, festoi kombëtarja e Shqipërisë dhe tifozët shqiptarë që kishin mbushur stadiumin.

Rumania e nisi më mirë ndeshjen ku në minutat e para rrezikuan në portën e Shqipërisë. Por mbrojtja e Shqipërisë ishte mjaft e fortë me dy lojtarët Mërgim Mavraj dhe Arlind Ajeti në një formëtë shkëlqyer. Shqiptarët filluan të fitonin terren ku arriten të krijonin një rrezik të madh në portën e Rumanisë. Pas një krosimi në zonë, Lenjani nuk arriti të shtynte topin në rrjetë me një portë të boshatisur. Por ky rast nuk i demoralizoi djemtë e kombëtares Kuq e Zi. Ata vazhduan të krijonin presion ndaj kundërshtarit dhe në minutën e '43 pas një krosimi nga Ledjan Memushaj ishte Armando Sadiku që e ktheu krosimin në një gol historik për kombin tonë. Goli i parë për kombëtaren Shqiptare në një kompeticion aq të rëndësishëm mban emrin e elbasanasit. 

Pjesa e dytë ishte me e qetë, me një Rumani që mundohej të na befasonte, por mbrojtja dhe portieri i kombëtares Shqiptare ishin gjithmonë të vëmendshëm. Shqipëria arriti të menaxhonte mjaft mirë rezultatin deri në fundin e ndeshjes.

Pas mbylljes së ndeshjes shpërthen festa jo vetëm në stadium, por në çdo vend ku ka shqiptarë. Një mbrëmje historike që nuk do harrohet nga një komb i cili kishte vite të tëra që priste këtë natë.

Asgjë nuk është mbyllur. Tani priten rezultatet e ndeshjeve të tjera për të kuptuar se cilat janë skuadrat që kalojnë më tej në EURO 2016. Ju kujtojmë se dy vendet e para të secilit grup kalojnë grupin. Ndërsa nga 6 grupe, 4 skuadrat e vendeve të treta që kanë rezulatet më të mira do ju bashkohen ekipeve elitë për ëndrrën e madhe, finalen e EURO 2016. 

Shqipëria është akoma në lojë për një vend mes tyre, por edhe nëse nuk e arrin, kombëtarja e Shipërisë e ka fituar europianin e saj.

Tani presim rezultatet e ndeshjeve të tjera dhe shpresojmë që fati të jetë me kombëtaren Shqiptare.

(Portali Shkollor)

2,146 Lexime
8 vjet më parë