Poetja Laureate Rita Petro në Trieste: Poezia shqipe ndërton ura mes kulturave dhe brezave

LETËRSIA BASHKËKOHORE SHQIPE NË TAKIM ME NXËNËSIT E LICEUT KLASIK “DANTE ALIGHIERI “ TË TRIESTES.

Një dialog mes poezisë, gjuhës dhe kulturave me poeten Rita Petro

Trieste – Letërsia bashkëkohore shqipe ishte në qendër të një takimi të rëndësishëm kulturor, një bashkëpunim i organizuar Shoqata Kulturore ARBËRIA Trieste me Liceun Klasik “Dante Alighieri” i Triestes, me pjesëmarrjen e poetes Rita Petro, një prej zërave më të njohur dhe më të vlerësuar të letërsisë bashkëkohore shqiptare.

Nisma lindi nga një projekt i ideuar nga Kamelja Shehu, anëtare e Shoqatës Kulturore ARBËRIA Trieste, në bashkëpunim me drejtoreshën e Liceut Klasik “Dante Alighieri”, Trieste, doktoreshën Carmela Testa.

Ky aktivitet përbënte një mundësi të rëndësishme për njohjen dhe thellimin e njohurive mbi poezinë, gjuhën dhe kulturën shqiptare, duke përfshirë aktivisht nxënësit në një proces njohjeje dhe shkëmbimi ndërkulturor.

Takimi u hap nga profesoresha Federica Daniele, e cila përshëndeti të pranishmit, mirëpriti të ftuarit dhe bëri prezantimin hyrës të aktivitetit. Më pas, moderimi vijoi me Endra Becolli, anëtare e Shoqatës Kulturore ARBËRIA Trieste, e cila drejtoi bisedën mes protagonistëve të këtij takimi: poetes Rita Petro dhe përkthyesit Kledi Kalaja, i cili luajti një rol të rëndësishëm në lehtësimin e komunikimit dhe të pjesëmarrjes së nxënësve.

Një nga elementet më domethënëse të këtij aktiviteti ishte përfshirja e drejtpërdrejtë e të rinjve. Nxënësit nuk u mjaftuan vetëm me dëgjimin, por u bënë pjesëmarrës aktivë të takimit, duke lexuar vetë poezi të ndryshme e duke dialoguar drejtë për së drejti me poeten por edhe me vajzën e saj Sofiana Filipi e cila ftoi studentët drejtë rrugëtimit të studimit e të kulturës si vetmja pasuri drejtë një të ardhmeje më të mirë vetjake e shoqërore.

Ky ishte një moment veçanërisht i bukur dhe frymëzues, që u dha mundësinë të njiheshin më nga afër me ndjeshmërinë poetike të autores dhe të zbulonin vlerën e fjalës si mjet shprehjeje, reflektimi dhe komunikimi ndërmjet kulturave.

Prania e Rita Petros u ofroi nxënësve mundësinë të njihnin më nga afër një autore të rëndësishme të letërsisë bashkëkohore shqiptare, duke reflektuar mbi rolin e poezisë në shoqëri dhe aftësinë e saj për të shprehur emocione, përvoja dhe identitete.

Në këtë takim ishte i pranishëm edhe gazetari i Rai 3, Antonio Caiazza, një mbështetës i rëndësishëm i Shoqatës ARBËRIA Trieste dhe i veprimtarisë së saj kulturore.

Një falënderim i veçantë i drejtohet gjithashtu Hektor Lekës, i cili realizoi me profesionalizëm fotografitë dhe filmimet e aktivitetit, duke dokumentuar dhe përjetësuar momentet më domethënëse të kësaj dite.

Shoqata Kulturore ARBËRIA Trieste shpreh mirënjohjen e saj për drejtoreshën e shkollës Zj.Carmela Testa, profesoreshën Federica Daniele,profesorin Gabriele Donato, Presidenten e shoqatës kulturore zj.Adela Shehu, Endra Becolli, Rita Petro, Kledi Kalaja, Kamelja Shehu, Sofiana Filipi dhe të gjithë ata që kontribuuan në realizimin e këtij takimi. Një falënderim i veçantë u drejtohet nxënësve për pjesëmarrjen e tyre aktive, interesimin dhe përfshirjen gjatë gjithë aktivitetit.

Kjo nismë dëshmon edhe një herë rëndësinë e bashkëpunimit ndërmjet institucioneve arsimore dhe shoqatave kulturore në krijimin e mundësive edukative që zgjerojnë horizontet e të rinjve, nxisin njohjen e traditave të ndryshme letrare dhe forcojnë respektin për identitetet kulturore.

Për Shoqatën ARBËRIA Trieste, promovimi i gjuhës dhe i letërsisë shqipe përbën një pjesë thelbësore të misionit të saj: të ruajë rrënjët, të përcjellë kulturën te brezat e rinj dhe të ndërtojë ura dialogu ndërmjet komunitetit shqiptar dhe qytetit të Triestes.

Sepse letërsia nuk njeh kufij: përmes poezisë, fjalët shndërrohen në takime, dallimet bëhen pasuri dhe kulturat gjejnë mundësi të reja për t’u njohur, për t’u afruar dhe për të dialoguar.

Shoqata Kulturore ARBËRIA Trieste