Angazhojini fëmijët të shijojnë pushimet verore, edhe kur janë në shtëpi
Alternimi mes lojërave virtuale dhe atyre në natyrë e ndihmon cilindo fëmijë të rritet shëndetshëm. Brezi i sotëm i fëmijëve favorizohet nga larmishmëria e zgjedhjeve, mjafton që prindërit t’i angazhojnë të jenë produktiv në lojërat e zgjedhura.
Koncepti i pushimeve verore në optikën e fëmijëve kremtohet si koha e lirive dhe argëtimit pa angazhime shkollore. Në kohët e sotme, ku kryefjalë mbetet teknologjia dhe të mirat e pafundme, fëmijët i orientojnë preferencat më shumë drejt lojërave virtuale krahasuar me ato në natyrë. Edhe gjatë pushimeve në bregdet, marrëdhënia e fëmijës me telefonin apo ipadin është e ngushtë, e thuajse e pandashme.
Interneti dhe lojërat virtuale janë mburojë për shumë fëmijë me natyrë të ndrojtur, të cilët preferojnë të qëndrojnë brenda mureve të shtëpisë. Sot, qëndrimi i fëmijëve brenda shtëpisë është fenomen shqetësues, pas i lidh fëmijët me teknologjinë. Mbi këtë fenomen, të shumtë janë prindërit që bien dakord. Zgjidhja mbetet e vështirë, veçanërisht kur të dy prindërit janë në punë dhe izolimi i fëmijës në shtëpi është i pashmangshëm. Alternimi mes lojërave virtuale dhe atyre në natyrë e ndihmon cilindo fëmijë të rritet shëndetshëm. Brezi i sotëm i fëmijëve favorizohet nga larshmëria e zgjedhjeve, mjafton që prindërit t’i angazhojnë të jenë produktiv në lojërat e zgjedhura.
Si të kultivoni aktivitete argëtuese për fëmijët?
Fëmija mëson se gjatë kohës kur prindërit janë në punë, ai ka mundësi:
- të luajë videolojëra, të shikojë televizor ose të lundrojë në internet
- të ngjyrosë, të shkruajë apo të vizatojë
- të lexojë një libër artistik me përralla, aventura dhe fantazi
- të shikojë filma të animuar me bazë edukative, etj
- të argëtohet në nje mini pishinë në shtëpi gjatë orëve të nxehta
- të bëj joga apo ushtrime të lehta fizike, të kërcejë
Fëmija mëson se kur prindërit kthehen në shtëpi, ekzistojnë të tjera mundësi për ta shfrytëzuar kohën e mbetur të ditës, si:
- të shëtisë në park me familjen,
- të shoqërohet me miqtë dhe të socializohet,
- të luajë me biçikleta ose me skuter,
- të ndjekë sportet ose kurset e preferuara, etj.
- të gatuaj (të përpiqet) bashkë me mamin ose babin
- ta kthej kohën e mbledhjes së lodrave të shpërndara nëpër shtëpi si një garë me pjesëtarët e tjerë të familjes
Fëmija mëson se kur prindërit janë të lirë në fundjavë, atëherë ai mund:
- të argëtohet duke notuar në pishina ose në plazh
- të eksplorojë përmes ekskursioneve në natyrë
- të luajë letra dhe lojëra tryeze me familjarët
Fëmija mëson të krijojë dhe të menaxhojë aktivitetet ditore duke u bazuar në sjelljet e prindërve dhe rrethit të ngushtë. Pa dyshim, ka ditë të verës ku vapa fashit çdo veprimtari dhe dëshirë për të dalë nga shtëpia, por krijimi i një rutine argëtuese dhe njëkohësish edukative ndihmon që koha e fëmijëve të jetë investim, jo shpenzim.
Përgatiti: Xhoana Jaku
© Portali Shkollor- Të gjitha të drejtat e rezervuara. Ndalohet kopjimi pa lejen tonë.
Si të ndihmoni fëmijët tuaj të shmangin ankthin nga shkolla
Si është të rritesh në një familje toksike? Njihuni me dëmet emocionale nga prindërimi difunksional
Ramazan 2024, çfarë duhet të kenë parasysh mësuesit për nxënësit që agjërojnë?