“Di – Trego – Rritu”: Një strukturë e thjeshtë për reflektim dhe rritje në arsim

“Di - Trego – Rritu”

Nga Fiqiri Çifliku, ekspert arsimi 

Një strukturë e thjeshtë për një ndryshim i fuqishëm në të menduarit e nxënësve dhe stafit. Si një kujtesë se mësimdhënia e mirë balancon afirmimin me aspiratën, synon t'i ndihmojmë nxënësit dhe stafin të reflektojnë në mënyrë më kuptimplote.

Di: Çfarë di tashmë?

Trego: Si mund ta demonstroj qartë këtë?

Rritu: Cili është hapi im i ardhshëm përpara?

Kjo strukturë mund të inkurajojë nxënësit dhe stafin të zotërojnë udhëtimin e tyre, pavarësisht nëse përdoret në fund të një mësimi, gjatë reagimeve të kolegëve ose për vetëvlerësim.

Për drejtuesit e shkollave mund të jetë një mjet po aq i fuqishëm sa edhe takimet apo trajnimet që zhvillohen në shkollë.

Mendoj se nuk është e nevojshme për sisteme komplekse për të siguruar reflektim. Mjafton të përdorim fjalët e duhura, në kohën e duhur.

Struktura "Di - Trego - Rritu", mund të motivojë duke i bërë individët më të vetëdijshëm për atë që kanë mësuar dhe kuptuar (Di). Kjo vetëdije i ndihmon të ndihen më të sigurt dhe të motivuar për të vazhduar më tej. Kur individët kanë mundësinë të tregojnë atë që kanë mësuar (Trego), ata ndihen të vlerësuar dhe të njohur për përpjekjet e tyre. Kjo rrit vetëvlerësimin dhe motivimin e tyre për të performuar më mirë duke identifikuar hapat e ardhshëm për përmirësim (Rritu).

Kjo mund të shërbejë si instrument për të kuptuar se çfarë është bërë mirë dhe çfarë mund të përmirësojmë, duke u motivuar për të bërë përpjekje të mëtejshme.

Zbatimi i "Di - Trego - Rritu" në shkolla mund të bëhet në disa mënyra për të nxitur të menduarin kritik dhe zhvillimin e vazhdueshëm të nxënësve dhe stafit, si dhe për të planifikuar apo reflektuar mbi projektet dhe detyrat e tyre.

Në fund të mësimit nxënësit mund të plotësojnë një formular të shkurtër reflektimi ku përgjigjen pyetjeve: "Çfarë mësova sot?" (Di), "Si mund ta demonstroj këtë?" (Trego), dhe "Çfarë dua të përmirësoj më tej?" (Rritu). Nxënësit mund të mbajnë një ditar reflektimi ku shkruajnë rregullisht për përparimin e tyre.

Drejtuesit e shkollës mund të përdorin këtë strukturë gjatë takimeve apo veprimtarive trajnuese me mësuesit për të diskutuar përparimin e tyre profesional. Për shembull, "Çfarë kuptoni tashmë për këtë metodë mësimore?" (Di), "Si e keni zbatuar atë në klasë?" (Trego), dhe "Cilat janë hapat tuaj të ardhshëm për përmirësim?" (Rritu).

Për të maksimizuar efektivitetin e strukturës "Di - Trego - Rritu", duhet të përshtasim atë sipas nevojat specifike të nxënësve dhe stafit. Për shembull, për nxënësit që kanë nevojë për më shumë mbështetje, mund të shtosh pyetje ndihmëse për secilën fazë.

Integrimi i mjeteve digjitale si aplikacionet e reflektimit ose platformat e mësimit online mund të ndihmojnë në mbledhjen dhe analizën e të dhënave në mënyrë më efektive, por duhet të jemi të sigurtë që mësuesit të jenë të trajnuar për të përdorur këtë strukturë në mënyrë efektive.

Drejtimi i shkollës duhet të sigurojë informacion të rregullt dhe të vazhdueshëm, jo vetëm në fund të një projekti apo mësimi, si dhe kërkon angazhim të prindërve në procesin e reflektimit dhe përmirësimit.

Angazhimi i prindërve në procesin e mësimit të fëmijëve është shumë i rëndësishëm dhe mund të arrihet nëse vendosen komunikime të rregullta. Organizimi i takimeve të rregullta me prindërit për të diskutuar përparimin dhe nevojat e fëmijëve. Kjo mund të realizohet jo vetëm përmes takimeve fizike, por edhe telefonatave ose platformave online.

Të inkurajosh prindërit të marrin pjesë në aktivitete shkollore si ditët e hapura, projektet e klasës, dhe ngjarjet sportive, i ndihmon ata të ndihen më të lidhur me shkollën dhe të kuptojnë më mirë përvojat e fëmijëve të tyre.

Nuk duhet të mungojnë udhëzimet dhe burime për prindërit që të ndihmojnë fëmijët e tyre me detyrat e shtëpisë dhe projektet. Kjo mund të përfshijë krijimin e një rutine të qartë për studim dhe sigurimin e një mjedisi të qetë për mësim.

Një mënyrë për të afruar prindërit me shkollën është edhe organizimi i seminareve dhe trajnimeve për prindërit, për t'i ndihmuar ata të kuptojnë më mirë nevojat dhe sfidat e fëmijëve të tyre. Kjo mund të përfshijë tema si mbështetja emocionale, menaxhimi i kohës dhe përdorimi i teknologjisë. Është me përfitim të jashtëzakonshmë të nxitni prindërit të flasin hapur me fëmijët e tyre për përvojat dhe ndjenjat e tyre. Kjo ndihmon në krijimin e një mjedisi të sigurt dhe mbështetës ku fëmijët ndihen të dëgjuar dhe të vlerësuar.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.