Rregulla të ashpra kundër detyrave të shtëpisë me “IA”: Nxënësit do t’i mbrojnë me gojë, punimet e tyre me shkrim

Danimarka do të tentojë të luftojë dredhitë e nxënësve, që shfrytëzojnë inteligjencën artificiale për të mos lodhur mendjen e për t’i bërë në mënyrë perfekte, detyrat e shtëpisë apo punimet e tjera me shkrim.

Viti i ri shkollor nis më 11 gusht, datë nga e cila hyjnë në fuqi rregullat e reja të vendosura nga qeveria daneze.

Ato detyrojnë rreth 9 mijë nxënës shkollash, kryesisht ata të klasave të larta të ciklit të ulët që të mbrojnë me gojë përpara mësuesve, punimet e tyre me shkrim, për të provuar se janë punuar nga vetë ata.

Shkollat do të detyrohen të instalojnë programe të posaçme mbrojtëse në rrjetet e tyre për të mbikëqyrur ekranet e kompjuterëve gjatë orëve të mësimit.

Shumica e punëve me shkrim do të kryhen në klasë dhe jo më në shtëpi. Sipas autoriteteve arsimore, kjo ndërhyrje e menjëhershme synon parandalimin e zbehjes së mendimit kritik dhe aftësive analitike te të rinjtë.

Edhe vende të tjera kanë shprehur shqetësim për efektet negative të përdorimit të inteligjencës artificiale në shkolla.

Në Suedi, janë shtuar ndjeshëm dënimet për këto lloj abuzimesh, ndërsa në SHBA është vendosur mbikëqyrje e rreptë për studentët në shumë universitete.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.