Laps kimik apo stilolaps?
E përdorni shpesh leksemën “laps kimik”, por në fakt ju duhet ta dini se në vend të saj duhet të përdoret krejt një leksemë tjetër.
Një numër shumë i madh profesionistësh e përdorin zakonisht një leksemë të tillë në bisedat e tyre të përditshme, ose edhe në institucionet shtetërore ku ata punojnë.
U ka kaluar në shprehi tashmë dhe me të madhe përdoret po e njëjta leksemë edhe nga nxënësit, edhe nga vetë arsimtarët e tyre.
Ky formim leksikal është ndërtuar sipas gjedhes së huaj me rrugë përkthimi nga gjuhët sllave (maqedonishtja a serbokroatishtja: “hemijska olovka”) dhe në shqipen letrare si i këtillë, sipas Qemal Muratit, është një kalk i panevojshëm. Në vend të termit “laps kimik” duhet të përdoret leksema “stilolaps” (një kompozitë e formuar prej dy pjesësh: stilo+laps). “Stilo+laps” do të thotë “lapsi që shkruan si stilograf”.
Kuptimet e leksemave “stilolaps” dhe“stilograf”, sipas FGJSSH-së:
I. STILOLAPS m.
Lloj lapsi që shkruan me bojë, i përbërë nga një gyp i hollë i mbushur me bojë të trashë dhe nga një majë prej metali; laps që shkruan si stilograf.
II. STILOGRAF m.
Mjet për të shkruar, i përbërë nga një gyp që mbushet me bojë dhe nga një majë pene prej metali, tek e cila boja shkon vetiu.
Në FGJSSH është regjistruar edhe fjala“stilokalem”, por kjo fjalë jepet me një përdorim të kufizuar e përdoret shumë rrallë dhe në vend të saj gjithsesi duhet të përdoret leksema “stilolaps”.
Vini re!
Përdoret: Laps kimik. P.sh.: A e ke një laps kimik? Ai shkruan me laps kimik.
Duhet: Stilolaps. P.sh.: A e ke një stilolaps? Ai shkruan me stilolaps.
(Nga: MA. Mentor Hajrizi, Portali Shkollor)
Pse paskajorja gege nuk është integruar dot në shqipen standarde?
Gabimet tona me përemrat “UNË” dhe “TI”
Në vend që të ndihet krenare, sipas medieve tona, Dua Lipa kërkon “falje” që është krenare