Dedikim nga mësuesi Gëzim Dalliu: Udhëtimi i minimaturës, kujtime, rritje dhe urime për të ardhmen

Nga Gezim Dalliu

E dashur Minimaturë!

Sot është një ditë që nuk harrohet lehtë. Një kapitull mbyllët, një tjetër nis. Sot, ju nuk jeni më vetëm nxënës të kësaj shkolle, por jeni kujtimet e gjalla, më të bukura, zëra që keni mbushur klasën me jetë,shkollën me gëzim. Jeni ju që sytë tuaj keni kërkuar dijen, dhe zemra ju ka rrahur fort për këtë ëndërr. Nëntë vite më parë, ndoshta me çanta më të mëdha se vetë ju, hytë në këtë udhë të bukur,të hutuar, të gëzuar, ndoshta edhe të trembur,por dita e sotme tregon se sa shumë keni ndryshuar. Jeni rritur. Keni mësuar jo vetëm lëndë e faqe librash, por jeni njerëz më të mirë, më të fortë, më të dashur. Kjo minimaturë nuk është thjesht një festë. Është një ndalesë e bukur, për të kthyer kokën pas me krenari dhe për të parë përpara me guxim. Jeta ju pret me sfida të reja, por edhe me mundësi të pafundme. Besoni tek vetja, mos u dorëzoni kurrë dhe mos harroni rrënjët, shkollën që ju formoi që ju dha dije të ecni gjatë në rrugën e jetës. Ju falënderoj për çdo buzëqeshje, për çdo përpjekje, për çdo kujtim që më keni dhuruar. Do më mungoni, por do të jem gjithmonë krenarë për ju! Le të jenë këto fjalë kuptimi dhe kujtimi më i bukur i kësaj Minimature! Urime nga zemra! Shkëlqeni gjithmonë, kudo që të shkoni! Le të jenë këto vargje vlera e rrugëtimit që mbyllët dhe drita e të ardhmes! 

Të vegjël ju gjeta

Ju u rritët ngadalë

Me zemër te ju mbeta

A po ndahemi vallë?

Koha rrodhi ndër vite

E mbushur me kujtime

Shkëlqeni si rreze drite

Sot nuk ka trishtime.

Hidhni sytë nga fillimi

Zilen mos e harroni

Se aty  nisi udhëtimi

Dijet që morët i çmoni.

Emrin e pikturuat

E qëndisët me arë

Mirësinë vetë gatuat

Jeta u ecte mbarë.

Kjo shtëpi ju dha dituri

Nënte vite plot jetë

Klasë model me urtësi

Gurë themeli do të mbet.

Koha po ju pret

Rruga tjetër do të nisë

Ju paçi vetëm shëndet

Kujtimet do ti ngjisë.

Qëndisëm  një miqësi

Hapëm udhën e jetës

Vitet e bukura me mirësi

Mbeten lule e të vërtetës.

Shoqërinë mos e harroni

 E mbani gjithnjë në zemër

Atë gjithmonë kujtoni

Se ajo ju dha një emër.

Mbarësi kudo ku shkoni

Shkolla ju dha dituri

Vlerën gjithmonë përçoni

Me dëshirë dhe mirësi.

E mbyllëm ketë rrugëtim

Si valët që ka një det

E meritoni këtë urim

Suksese paçi në jetë!

© Portali Shkollor- Të gjitha të drejtat e rezervuara. Ndalohet kopjimi pa lejen tonë.