Takim përkujtimor në shkollën "Met Hasa" në Durrës mbi veprën "Djemtë e luftës", me pjesëmarrjen e Edlira Dedjes

Në shkollën “Met Hasa” në Durrës u zhvillua një takim përkujtimor dhe letrar me Edlira Dedja, në nder të veprës “Djemtë e luftës” të shkrimtarit të ndjerë Bedri Dedja, me pjesëmarrjen e LANC me degë në Durrës.

Veprimtaria u organizua në kuadër të 5 Majit, Ditës së Dëshmorëve të Atdheut, duke i kushtuar një homazh të veçantë heroit të popullit Met Hasa, emrin e të cilit mban edhe shkolla, si simbol i sakrificës dhe qëndresës.

Në një atmosferë mikpritëse dhe reflektuese, vjaza e Bedri Dedjas, Edlira Dedja, u ndal te rëndësia e kësaj dite në kujtesën historike dhe edukimin e brezave të rinj. Ajo solli në vëmendje një mesazh universal për paqen, duke cituar: “Sot, në ditën e 5 majit, të kësaj dite të shenjtë të përkujtimit të dëshmorëve që dhanë jetën për lirinë, pavarësinë dhe dinjitetin e atdheut, kam shkëputur një copëz për t’ua lexuar nga Kushtetuta e UNESCO-s, shkruar që në vitin 1945. Meqenëse luftërat fillojnë në mendjet e njerëzve, është në mendjet e njerëzve që mbrojtja e paqes duhet të ngrihet...”

Më tej, ajo u ndal te figura e Met Hasës dhe te vepra e Bedri Dedjes, duke theksuar rëndësinë e kujtesës historike:

“Eshtë e drejtë që ju ta njihni historinë e tij dhe një gjë e tillë është bërë e mundur nga dëshmia që na lë trashëgim shkrimtari i njohur për fëmijë, Bedri Dedja, me romanin ‘Djemtë e luftës’.”

Duke sjellë në vëmendje aktin heroik të vogëlushit Met Hasa, ajo u shpreh:

“Historia e Met Hasës, vogëlushit që me gjoksin e tij të njomë mbuloi tytën e mitrolozit nazist, është një histori e rrallë, sa heroike, aq edhe e dhimbshme…”

Në vijim, Edlira Dedja foli edhe për vështirësinë e kuptimit të historisë nga brezat e rinj dhe rolin e letërsisë në këtë proces:

“Ju e keni të vështirë të imagjinoni realitetin e konflikteve të tilla… ju e keni të vështirë të imagjinoni se si lufta goditi civilët më shumë se ushtarakët…”

Ajo theksoi se romani “Djemtë e luftës” mbetet një dëshmi e gjallë e kohës:

“Romani ‘Djemtë e luftës’ është një rrëfim i rrallë biografik… një kronikë e gjallë e asaj kohe, ilustruar me ngjarje që zbulojnë momente të brishta të fëmijërisë.”

Në të njëjtën kohë, ajo nënvizoi edhe vlerën përkujtimore të veprës për qytetin e Durrësit:

“Ky roman është edhe një homazh për qytetin e Durrësit dhe për rezistencën që ky qytet i bëri pushtimit që nga dita e parë.”

Në përmbyllje, ajo u ndal te rëndësia e edukimit historik përmes shkollës dhe librit:

“Njohja me historinë na ndihmon të rritemi dhe të ballafaqohemi me realitetin, për të mos lejuar kurrë më që këto tragjedi të përsëriten.”

Takimi u mbyll me diskutime dhe interes të gjallë nga nxënësit dhe të pranishmit, duke u shndërruar në një dialog mbi historinë, letërsinë dhe kujtesën kolektive.