Dy medalje për Shqipërinë në Olimpiadën Botërore të Inteligjencës Artificiale

Një tjetër sukses ndërkombëtar vjen nga nxënësit shqiptarë në fushën e teknologjisë dhe inteligjencës artificiale. Dion Peshtanaku dhe Troi Qendro kanë përfaqësuar Shqipërinë në Olimpiadën e Tretë Botërore të Inteligjencës Artificiale, ku kanë arritur të renditen mes më të mirëve në një kompeticion ku morën pjesë 440 konkurrentë nga 103 shtete të botës.

Dion Peshtanaku u vlerësua me Medaljen e Bronzit, ndërsa Troi Qendro mori Medaljen e Nderit, duke i sjellë Shqipërisë dy vlerësime në një prej kompeticioneve ndërkombëtare që fokusohen te inteligjenca artificiale dhe teknologjitë e së ardhmes.

Sipas Ministrisë së Arsimit, pas këtij rezultati qëndrojnë talenti dhe puna e dy nxënësve, por edhe përkushtimi i mentorëve të tyre dhe puna e Albanian ICT Academy dhe STEM Hub Albania, të cilat kanë krijuar mundësi për të rinjtë shqiptarë që të përballen me bashkëmoshatarët e tyre nga vende të ndryshme të botës.

Pjesëmarrja dhe rezultatet e Dionit dhe Troiut vijnë në një kohë kur inteligjenca artificiale po merr një rol gjithnjë e më të rëndësishëm në teknologji, ekonomi dhe arsim, duke e bërë përgatitjen e të rinjve në këto fusha një prej sfidave kryesore për të ardhmen.

Dy medalje në një garë botërore me 440 të rinj nga 103 vende përbëjnë një rezultat të rëndësishëm për nxënësit shqiptarë dhe një tjetër dëshmi të potencialit të të rinjve në fushat e teknologjisë dhe inovacionit.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.