18 vjetori i Pavarësisë së Kosovës, nga ngritja e flamurit te seanca solemne!

Më 17 shkurt, Kosova shënon 18-vjetorin e shpalljes së Pavarësisë, ditë krenarie e kujtese kombëtare. Aktivitetet nisën me ngritjen e flamurit e vijojnë me homazhe, seancë solemne dhe koncert festiv, duke nderuar rrugëtimin historik drejt lirisë dhe shtetësisë së plotë të Republikës së Kosovës.

Këtë 17 shkurt, Kosova shënon 18-vjetorin e shpalljes së pavarësisë, një nga datat më të rëndësishme në historinë moderne të vendit. Më 17 shkurt 2008, Kuvendi i Kosovës miratoi Deklaratën e Pavarësisë, duke e shpallur Kosovën shtet të pavarur, sovran dhe demokratik.

Me rastin e këtij përvjetori, institucionet shtetërore kanë organizuar një sërë aktivitetesh zyrtare dhe ceremoniale, duke nisur nga ngritja e flamurit në oborrin e godinës së qeverisë , te mbledhja solemne e qeverisë.

Agjenda e manifestimeve shtetërore:

07:00 – Ngritja e Flamurit të Republikës së Kosovës (Oborri i Qeverisë)

07:20 – Mbledhja solemne e Qeverisë së Republikës së Kosovës (Ndërtesa e Qeverisë)

07:30 – Nderime te Monumenti i të Pagjeturve (Sheshi “Ibrahim Rugova”)

07:35 – Homazhe te Pllaka Përkujtimore e Fëmijëve të Vrarë (Oborri i Presidencës)

08:00 – Homazhe te varri i ish-Presidentit Ibrahim Rugova (Varrezat në Velani)

08:10 – Homazhe te varri i veprimtarit Adem Demaçi (Varrezat në Velani)

09:00 – Homazhe në Kompleksin Memorial “Adem Jashari” në Prekaz

10:30 – Seancë solemne e Kuvendit të Republikës së Kosovës (Kuvendi i Kosovës)

11:25 – Nderime te Monumenti “Heroinat” (Rr. Luan Haradinaj)

11:30 – Parakalimi i Trupave të Forcës së Sigurisë së Kosovës dhe Policisë së Kosovës (Rr. Luan Haradinaj)

17:30 – Pritje shtetërore nga Presidentja, Kryetari i Kuvendit dhe Kryeministri

20:00 – Koncert solemn i Filharmonisë së Kosovës (Salla e Kuqe – Pallati i Rinisë)

Dita e Pavarësisë përkujton sakrificën dhe rrugëtimin e gjatë drejt lirisë, duke bashkuar qytetarët në nderim të figurave historike dhe në festim të arritjeve shtetërore.