FTUAR NË RRETHIN E DHJETË/ Takim me Flutura Açkën
Një takim mbresëlënës ai i mbasdites së djeshme, ku temë kryesore ishte ajo e identitetit të shqiptarëve në raport me historinë e shkuar dhe të sotme. Frymëzim për këtë bisedë u bë romani i fundit i Flutura Açkës...
Një takim mbresëlënës ai i mbasdites së djeshme, ku temë kryesore ishte ajo e identitetit të shqiptarëve në raport me historinë e shkuar dhe të sotme. Frymëzim për këtë bisedë u bë romani i fundit i Flutura Açkës e FTUAR NË RRETHIN E DHJETË.
Në romanin e Açkës prishet linja e rrëfimit të një romani tradicional. Fati i personazheve kryesore kryqëzohet me fatin e historisë së kombit të tyre, duke i dhënë romanit sa freski letrare aq edhe elemente historike. Kjo realizohet edhe me kthimin përmbys të alegorisë, (figura kryesore në Komedinë hyjnore), e cila i shërben autores si një detaj letrar për të strukturuar rrëfimin e saj. Nga alegoria kemi kalimin në paralelizëm. Siç tha dhe vetë shkrimtarja për mëkatet e politikës shqiptare nuk mjaftojnë 9 rrathë, ndaj asaj i duhej të shtonte dhe rrethin e dhjetë si një gjetje artistike. Kujtimet nga koha e diktaturës kanë një funksion kryesor - për të justifikuar apo për të vërtetuar veprimet e mëpasme apo fatin tragjik të shqiptarëve që vuajnë për shkak të mëkatarëve politikanë. Më të mirët, më të aftët dhe më të ndershmit detyrohen ta gjejnë fatin e tyre larg Atdheut.
Pavarësisht nga rrëfimet e shumta me ngjyresa historike, ndjeshmëria , ndjenja e dashurisë është e pranishme në roman dhe autorja e rrëfen këtë përmes personazheve të saj. Kemi disa ndjesi apo emocione me karakter negativ (si frika, frustrimi, nënvleftësimi i vetes, komplekset në edukimin seksual etj) dhe me karakter pozitiv si, dashuria në kuptimin më universal të saj.
Ky takim u gjallërua mjaft edhe nga biseda që u zhvillua rreth vështirësisë dhe kurajës që iu duhet grave shkrimtare për të shkruar një letërsi të sinqertë. Censura shtetërore dikur, censura shoqërore sot e veçanërisht autocensura, janë dukuri negative, me të cilat duhet të përballet shkrimtari (pavarësisht nga gjinia) për të realizuar një letërsi të vërtetë.
Latif Ajrullai, mësuesi idealist dhe sipërmarrësi vizionar
Një tjetër trajnim i suksseshëm i organizuar nga QTPA në Kosovë
ALBAS së shpejti do të publikojë planet e reja mësimore sipas udhëzimeve të fundit nga MASR