“8 femra” në Teatrin Kombëtar nën regjinë e Driada Dervishit

Çfarë ndodh kur tetë femra bëhen bashkë? Robert Thomas kishte dashur gjithnjë t’i bënte bashkë 8 femra në një komedi. Në artin ku ndërthuret e papritura, misteri, por edhe gazi, ato do të ktheheshin në personazhe të paharrueshme për publikun. Kështu, ai u ul të shkruante një nga komeditë më të ndjera, e njëkohësisht, më të shikuara në teatër, “8 femrat”. Regjisorja Driada Dervishi do ta pëlqente që kur lexoi për herë të parë tekstin.

E kjo jo se ishte një femër, por se vepra ka brenda forcën që duhet të ketë çdo komedi. Me aftësinë e një regjisoreje për t’i vendosur shpejt personazhet e duhura karaktereve të veprës, ajo zgjodhi 8 aktoret që do të bëheshin protagonistet e kësaj vepre në shqip. Yllka Mujo, Olta Daku, Zamira Kita, Rajmonda Bulku, Merita Çoçoli, Klodjana Keco, Blerta Belliu, Ilda Pepi e Paola Kodra do të jenë pjesë e komedisë “8 Femrat”.

Në këtë vepër rikthehen sërish bashkë në skenë aktoret e njohura Yllka Mujo dhe Rajmonda Bulku. 

Në Teatrin Kombëtar komedia misterioze me nota muzikali “8 FEMRA” shfaqet në datat: 27, 28, 29, 30 shtator dhe 1 Tetor; ora 19:00. 

Nën interpretimin e aktoreve: Yllka Mujo, Olta Daku, Zamira Kita, Rajmonda Bulku, Merita Çoçoli, Klodiana Keco, Paola Kodra, Blerta Belliu, Ilda Pepi me regji të Driada Dervishit, kostumografi Berina Kokona e skenë nga Fjoralba Prifti, konsulencë muzikore Adrian Jorgji, Yllka Mujo e Metila Dervishi. 

Rezervimet në nr. 042223022; orari biletarisë 09:00-13:00 dhe 16:00-19:00

“8 Femrat” do të shfaqet edhe në Teatrin e Durrësit.

(Portali Shkollor)