Me rastin e Ditës Ndërkombëtare të Romëve, përkujtojmë poetin dhe gazetarin e njohur Kujtim Paçakun

Kujtim Paçaku (1959-2018) gjatë kohës sa ishte gjallë njihej si përfaqësues i komunitetit rom në Kuvendin e Kosovës. Njëherazi ai përmendet edhe për punën si gazetar dhe për veprimtarinë e tij si poet. Përmes shkrimeve, Paçaku pasqyronte realitetin rom dhe dhimbjen përvëluese që ata gjithnjë ndienin.

Në vazhdim sjellim disa nga shkrimet e tij kushtuar romëve, të drejtave, padrejtësive dhe identitetit të tyre.

 SI BËHET KËNGA ROME

 Merre një grusht dhimbjeje

 Shto ca pika loti!

 E pak pluhur rrugësh të pasosura

 Pak aromë stinësh të harruara

 Në fund

 I shton erëza djegëse dashurie

 Dhe i hedh ca yje përsipër

 Dhe e lë të piqet

 Të piqet në zjarr të shpirtit

 Deri në agim…

 URIA

 Vaji i fëmijëve nuk ka të ndalur

 As këtë mbrëmje

 Aroma e gjellës së fqinjit

 As sonte nuk iu ngop barkun

 Kur zemra ka acar

 S’ka pranverë që mund ta shkrijë…

JAM ROM

Po, jam Rom

 Unë, ky që qëndron tash para jush

 Jam nga stërnipat e Gangut

 E bijtë e Lumbardhit

 Kurrë nuk isha mjaft i bardhë

 Për të bardhët

 As tamam i zi për të zinjtë

 Erdha vetëm t’u fal ca vargje

 E të marr ndonjë duartrokitje në këmbim

                                                      Kaq më mjafton të ndihem i lumtur

           Përgatiti: Arlinda Hajdaraj, gazetare përgjegjëse e Portalit Shkollor Albas për Kosovën. 
           ©Portali Shkollor- Të gjitha të drejtat e rezervuara. Ndalohet kopjimi pa lejen tonë.