"Almanaku i maturantëve 2025-2026", kujtesë krijuese nga nxënësit e Gjimnazit "Gjergj Kastrioti Skënderbeu" Krujë

Në një kohë kur përfundimi i gjimnazit shënon një nga momentet më të rëndësishme në jetën e të rinjve, vijnë edhe nisma që synojnë ta ruajnë këtë përvojë përtej kujtesës së përkohshme. Një i tillë është projekti “Almanaku”, i realizuar nga nxënësit e klasës 12B të Gjimnazit “Gjergj Kastrioti Skënderbeu” në Krujë, nën drejtimin e mësueses Soada Kullai Goga.

I konceptuar si një përmbledhje e mendimeve, krijimeve dhe përjetimeve të maturantëve, ky almanak vjen si një dëshmi autentike e rrugëtimit të tyre shkollor. Projekti, i zhvilluar në kuadër të kualifikimit 10-vjeçar të mësueses, nuk është thjesht një detyrë mësimore, por një përpjekje për të kapur thelbin e një periudhe të mbushur me sfida, emocione dhe rritje personale.

Përmes një pune të organizuar në disa faza, nga mbledhja e materialeve, përpunimi e deri te ndërtimi përfundimtar, nxënësit kanë sjellë një mozaik shkrimesh letrare dhe joletrare, duke reflektuar jo vetëm aftësitë e tyre krijuese, por edhe botën e tyre të brendshme në prag të një kapitulli të ri.

“Almanaku” shndërrohet kështu në një kujtesë kolektive, një pasqyrë e zhvillimit intelektual dhe emocional të një brezi, që sot mbyll një cikël dhe nesër nis një tjetër. Edhe simbolika e kopertinës e përforcon këtë ide: koha që ndryshon, rrugëtimi që vazhdon dhe drita e së ardhmes që i pret.

Më poshtë mund të shihni në format PDF të plotë këtë almanak, si një dëshmi të gjallë të këtij rrugëtimi dhe përkushtimi.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.