Studentë

Këshilla se si të përgatiteni për provime

Koha e provimeve? Ju propozojmë të merrni parasysh këto këshilla studimi dhe përpiquni ta mbani stresin larg! Mbani mend: ju mund t’ia dilni!

1. Jepini vetes kohë të mjaftueshme për të studiuar


Mos e lini deri në minutën e fundit. Ndërsa disa studentë duket se mund të kenë sukses pas mësimit në minutën e fundit, prapëseprapë kjo nuk është mënyra më e mirë për t'iu qasur një provimi. Për të ndihmuar në rregullimin e menaxhimit të kohës, vendosni një orar për të studiuar. Shkruani sa provime keni dhe ditët në të cilat duhet t'i mbani ato. Pastaj organizoni të studiuarit në përputhje me rrethanat. Ju mund të dëshironi t'iu kushtoni disa provimeve më shumë kohë se të tjerave, ndaj gjeni një ekuilibër me të cilin ndiheni rehat.



2. Organizoni hapësirën tuaj të studimit


Sigurohuni që të keni hapësirë të mjaftueshme për të shpërndarë tekstet dhe shënimet tuaja. A keni dritë të mjaftueshme? A është karrigia juaj e rehatshme? A e keni lënë anash telefonin?


Përpiquni të hiqni të gjitha shpërqendrimet dhe sigurohuni që të ndiheni sa më rehat dhe të aftë të përqendroheni sa të jetë e mundur. Për disa njerëz, kjo mund të nënkuptojë pothuajse heshtje të plotë, për të tjerët, muzika në sfond ndihmon. Disa prej nesh kanë nevojë për gjithçka plotësisht të rregullt dhe të organizuar në mënyrë që të përqendrohen, ndërsa të tjerët përqendrohen në një mjedis më të rrëmujshëm. Mendoni se çfarë funksionon për ju dhe gjeni kohë për ta bërë atë siç duhet.



3. Shpjegoni përgjigjet tuaja të tjerëve


Prindërit, vëllezërit dhe motrat tuaja mund të ju ndihmojnë gjatë kohës së provimit. Përdorini ata në avantazhin tuaj. Shpjegojuni përgjigjen e ndonjë pyetjeje. Kjo do t'ju ndihmojë ta kuptoni atë më qartë në kokën tuaj dhe gjithashtu të nënvizoni pjesët ku keni nevojë për më shumë punë.



4. Organizoni grupe studimi me miqtë


Mblidhuni me miqtë për një seancë studimi. Ju mund të keni pyetje për të cilat ata kanë përgjigje dhe anasjelltas. Nëse siguroheni të qëndroni të fokusuar në temë për një kohë të caktuar, kjo mund të jetë një nga mënyrat më efektive për të sfiduar veten.



5. Bëni pushime të rregullta


Gjersa mund të mendoni se është më mirë të studioni për sa më shumë orë që mundeni, kjo në fakt mund të jetë kundërproduktive. Nëse do të stërviteshit për një maratonë, nuk do të provonit të vraponit 24 orë në ditë. Po kështu, studimet kanë treguar se për mbajtjen afatgjatë të njohurive, pauzat e rregullta ndihmojnë vërtet.


Të gjithë janë të ndryshëm, ndaj zhvilloni një rutinë studimi që funksionon për ju. Nëse studioni më mirë në mëngjes, filloni herët përpara se të bëni një pushim në drekë. Ose, nëse jeni më produktiv gjatë natës, bëni një pushim më të madh më herët, në mënyrë që të jeni gati të qetësoheni në mbrëmje.


Mundohuni të mos ndiheni fajtorë që jeni jashtë duke shijuar rrezet e diellit në vend që të përkuleni mbi tekstet tuaja shkollore. Mos harroni se vitamina D është e rëndësishme për një tru të shëndetshëm.



6. Ushqehuni shëndetshëm


Ju mund të ndiheni sikur meritoni një ëmbëlsirë, ose se nuk keni kohë për të gatuar, por ajo që hani mund të ketë me të vërtetë një ndikim në nivelet e energjisë dhe fokusin, kështu që rrini larg ushqimeve të padëshiruara. Mbani trupin dhe trurin tuaj të ushqyer mirë duke zgjedhur ushqime me vlera ushqyese që janë vërtetuar se ndihmojnë përqendrimin dhe kujtesën, si peshku, arrat, farat, kosi dhe boronicat. E njëjta gjë vlen edhe në ditën e provimit - hani një vakt të mirë përpara testit, bazuar në ushqimet që do të ofrojnë një çlirim të ngadaltë të energjisë gjatë gjithë kohës. Sheqeri mund të duket tërheqës, por nivelet tuaja të energjisë do të bien një orë më vonë.



7. Pini shumë ujë


Si këshillë e fundit, mbani mend se të qenit i hidratuar mirë është thelbësore që truri juaj të funksionojë në mënyrën më të mirë të tij. Sigurohuni që të vazhdoni të pini shumë ujë gjatë përsëritjes, si dhe në ditën e provimit.



Burimi: Klikoni këtu 

 

Përgatiti: Era Baliu, gazetare përgjegjëse e Portalit Shkollor Albas për Kosovën

 

© Portali Shkollor- Të gjitha të drejtat e rezervuara. Ndalohet kopjimi pa lejen tonë. 

438 Lexime
1 muaj më parë