Një letër falënderimi për Entela Pojanakun, mësuesen e klasës së parë që mbolli dashuri dhe ëndrra...

Letër falënderimi për mësuesen Entela Pojanaku nga nëna dhe kolegia Rafaela Llakmani. Një mirënjohje e thellë për mësuesen që me dashuri, durim e përkushtim ka ndikuar në jetët e fëmijëve të saj, duke lënë gjurmë të paharrueshme në zemrat e tyre.

Një letër falënderimi për mësuesen Entela Pojanaku, shkolla 9- vjeçare "Kolë Koci", nga Rafaela Llakmani (prind, kolege)



E dashur mësuese Entela! 

Janë disa fjalë të vogla, që duhen thënë patjetër, për t’iu dhënë rëndësinë e duhur veprave të mëdha si kjo e juaja. 


Ju jeni mësuesja e parë e fëmijëve të mi dhe kjo është një nga dhuratat më të bukura në jetët e tyre. 

Që ditën e parë keni prekur zemrat e tyre duke bërë që t’ju duan pa kushte.


Ngrohtësia, fjalët e ëmbla, ledhatimet janë rrënjosur thellë brenda tyre. 

Me përkushtimin dhe dashurinë e një nëne keni projektuar në mendjet e tyre kështjella përrallore, rrugë të pazbuluara dhe mrekulli të reja duke fluturuar me flatrat e fantazisë.


Keni zgjuar ëndrrat e tyre duke iu dhënë shpresë dhe jetë. 

Keni zbuluar aftësitë dhe mundësitë e tyre, gjetje këto më te rëndësishme se zbulimi i Kolombit apo arritje të tjera shkencore. 


Shprehja: “Kështu më ka thënë mësuesja.”, do të jetë e ligjshme për mua duke më mbushur me besim dhe siguri për gjithçka që ti ke arritur të ndërtosh në qeniet e tyre. 


Të falënderoj për durimin që ke treguar dhe tregon vazhdimisht ndaj tyre, i cili në fund të ditës transformohet në një buzëqeshje dhe dy fjalë: “S’ka gjë.”


Ndihem e lumtur që një pjesë e jotja është bërë pjesë e tyrja tashmë.


Jam e bindur, që edhe pas shumë vitesh, ata do të thonë me krenari kur të të shohin në rrugë: “ Ja mësuese Entela, mësuesja jonë e pare”.




© Portali Shkollor- Të gjitha të drejtat e rezervuara. Ndalohet kopjimi pa lejen tonë. 

1,025 Lexime
3 ditë më parë