PIKËPAMJE

Sa kohë u japim nxënësve të mendohen para se t'u përgjigjen pyetjeve të bëra nga mësuesi?

A e kanë të lehtë të gjithë fëmijët të përgjigjen në mënyrë të menjëhershme, sapo mësuesi i drejton pyetjen në klasë? Disa prej tyre, jo. Ndaj, u duhet dhënë të gjithëve koha e nevojshme.

Kur isha nxënës gjëja që kisha më shumë inat ishte kur mësuesi bënte një pyetje para klasës dhe menjëherë, pa na dhënë kohë fare të mendoheshim, i vinte gishtin një nxënësi të përgjigjej. Nga momenti që ai mbaronte pyetjen derisa i vinte gishtin një nxënësi, une nuk mendoja përgjigjen, por mendoja a do te isha unë ai qe do pyetesha. 


Jepu nxënësve kohë të mendohen, në varësi nga tipi i pyetjeve, para se të presësh nje përgjigje nga ata. Për pyetejet frontale nga psikologët dhe didaktët, rekomandohet një kohë prej 3-5 sekondash. Kini parasysh që më i shpejti nuk është detyrimisht më i zgjuari. 


Gjithashtu rekomandohet të kerkohen vullnetarë, në vend që t'u thërrasësh emrin. Unë kërkoj nxënës vullnetarë të përgjigjen, sepse më ka ndodhur që nxënës të ndryshëm më kanë thënë: nuk dua t'i pergjigjem kësaj pyetjeje, nuk ndihem rehat kur më thërritet emri, nuk dua të jem në fokusin e vështrimit të të gjithëve. 


Në këtë rast nuk mund t'i forcosh. Duke e bërë zakon t'u japim nxënësve kohë dhe duke u kërkuar të mendohen ne i ndihmojmë ata të mësojnë rregullin e artë të komunikimit: Mendohu para se të flasësh. Thuaj të vërtetën, thuaj atë që mendon. Shembulli më i keq dhe influencë më negative në drejtim të komunikimit sot në Shqipëri jane analistët ne emisionet televizive. Analistët nuk e dëgjojnë njëri-tjetrin deri në fund, e ndërpresin diskutimin, e shpeshherë i kalojnë normat e etikës. 


Shpesh ndodh që ata të përçojnë në publik, por edhe tek nxënësit tanë të kundërtën e asaj që shkolla kërkon të bëjë. Thënë shkurt dhe thjesht ata, për mendimin tim, janë sot armiqtë e edukimit të nxënësve me rregullat e duhura të komunikimit.



(Neshat Hyka; Portali Shkollor)

2,067 Lexime
1 muaj më parë