Albas fiton Çmimin në Prozë në Panairin e Librit në Kosovë me romanin “Si shkruhet një roman dashurie” të Gazmend Krasniqit

Panairi i Librit në Kosovë, një nga ngjarjet më të rëndësishme kulturore të hapësirës mbarëshqiptare, mblodhi edhe këtë vit botues, autorë, studiues, përkthyes dhe mijëra dashamirës të librit, duke e kthyer Prishtinën në një qendër të rëndësishme të kulturës dhe letërsisë shqipe.

Përveç promovimeve, takimeve me autorë dhe aktiviteteve letrare, një nga momentet më të rëndësishme të panairit ishte ceremonia e ndarjes së çmimeve tradicionale, ku juria vlerësoi veprat më të spikatura të botuara gjatë vitit.

Një sukses i veçantë në këtë edicion shënoi edhe Shtëpia Botuese Albas. Romani “Si shkruhet një roman dashurie” i shkrimtarit Gazmend Krasniqi, botuar nga Albas, u shpall fitues në kategorinë Prozë, duke u renditur mes veprave më të vlerësuara të panairit.

Ky vlerësim përbën një tjetër dëshmi të përkushtimit të Albas për të sjellë pranë lexuesve vepra cilësore të letërsisë bashkëkohore shqipe, si dhe për të mbështetur autorët që kontribuojnë në pasurimin e kulturës dhe mendimit letrar.

Gjatë ceremonisë së ndarjes së çmimeve, juria shpalli fituesit në këto kategori:

●Letërsi për fëmijë: Valbona Banka, “Arratisje pa plan” (Botimet Dita);

●Poezi: Naime Beqiraj, “Mos i kallxo harrimit” (Botime Koliqi);

●Përkthim: Albana Nexhipi Lekaj, për përkthimin e romanit “Bija italiane” të Soraya Lane (Dituria);

●Prozë: Andreas Dushi, “Droja” (Onufri);

●Prozë: Gazmend Krasniqi, “Si shkruhet një roman dashurie” (Albas);

●Studime, kritikë dhe ese: Ben Andoni, “Shqipëria prej letrave” (Papirus);

●Çmim special – Autori shqiptar i Panairit të Librit 2026: Ben Blushi, “Jam mysliman” (Onufri);

●Çmim special – Autori më i mirë i huaj i Panairit të Librit 2026: Francesco Rapazzini, “Një verë veneciane” (Buzuku);

Çmim special për vepër jetësore: Nazmi Rrahmani, kryetari i parë i Shoqatës së Shkrimtarëve të Kosovës dhe botues i Shtëpisë Botuese “Faik Konica”.

Vlerësimet u dhanë nga juria e përbërë nga Behar Gjoka (kryetar), Alketa Gashi, Gani Bytyqi, Majlinda Nana Rama dhe Marigona Krasniqi.

Çmimi i fituar nga romani “Si shkruhet një roman dashurie” vjen si një lajm i gëzueshëm për Albas dhe për lexuesit e letërsisë shqipe, duke konfirmuar edhe një herë rolin e rëndësishëm që botuesit dhe autorët shqiptarë luajnë në zhvillimin e jetës kulturore në mbarë hapësirën shqipfolëse.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.