"Mes librave, luleve dhe gjimnazistëve"

Menjëherë pas takimit me gjimnazistët e Sami Frashërit, drejtoresha e botimeve në albas Rita Petro, ka shkruar se si ishte bashkëbisedimi me të rinjët e kësaj shkolle.

…dëgjova një ese të përsosur për bukurinë estetike dhe harmoninë në natyrë dhe në art, dëgjova vargje të interpretuara mrekullisht bukur, bashkëbiseduam për rëndësinë e të lexuarit për të njohur vetveten nëpërmjet personazheve, për disa nga dilemat e gjimnazistëve sot, dëshirën e tyre për t’u ndjerë të lirë dhe zhgënjimet nga kufizimet apo mentaliteti konservator i shoqërisë shqiptare sot, dëshirën e tyre për të konkurruar dhe shfaqur aftësitë e veta e për t’u ndjerë të barabartë në vlerësim, se sa e rëndësishme është të kundërshtosh me argumente që vijnë përmes dijes dhe…se sa e rëndësishme është përtej notës, zhvillimi i pasionit të tyre për sportin dhe artin, komunikimi me të tjerët, që është baza për t’u ndjerë një njeri i lumtur. Pyetjet e tyre shpesh të vinin në pozitë…dhe kjo ish diçka që më pëlqeu akoma më shumë…mprehtësia e tyre. 
Më befasoi komunikimi i tyre i hapur dhe inteligjent me mësuesen e letërsisë, Orjanën më të cilën kemi bashkëpunuar shumë vite më parë për modernizimin e programeve në shkollën e mesme. 

E falenderoj atë që ma zbukuroi ditën dhe që më dha mundësinë të ndihem e vlerësuar nga këta të rinj, por dhe e frymëzuar prej mendimeve dhe idealizmit të tyre.

Rita Petro