Një rrëfim shumëdimensional i Rita Petros në Athinë

Artistë, poetë, gazetarë, muzikantë, diplomatë dhe artdashës të komunitetit shqiptar, u takuan në ambientet e Ambasadës Greke, për të shijuar mbrëmjen letrare “Një rrëfim i Rita Petros”.

Në një rrëfim shumëdimensional, Rita Petro e dashuruar me prozën, bëri një skaner të shoqërisë shqiptare, perceptimin e saj për fenomenet që shoqërojnë të përditshmen tonë dhe një reflektim objektiv për individin, familjen, shoqërinë. 

Në vlerësimin që Ambasadorja znj. Luela Hajdaraga i bëri profilit të autores, theksoi midis të tjerave se, një emër i konsoliduar i letrave shqipe si Rita, promovon dhe inkurajon brezin e ri, i cili përveç lirisë së të shkruarit dhe lirisë së mendimit të ketë brenda vetes edhe artin e të shkruarit për të qenë frymëzimi i gjeneratës që përfaqëson.  

Ndërsa për profesorin e Universitetit të Prishtinës z. Ag Apolloni, i cili kishte ardhur enkas nga Kosova për këtë event, Rita Petro është shkrimtarja e poetja që thyen tabutë e të shkruarit që ka sjellë në frymë të re në krijimtarinë shqiptare, madje duke bërë edhe revolucion në letërsinë e dekadave të fundit.

Autorja iu përgjigj edhe interesit dhe kureshtjes së artdashësve për krijimtarinë e saj artistike.

“Është pak të them se sa e mrekullueshme ishte mbrëmja në mjediset e Ambasadës Shqiptare në Athinë, mes zonjave e zotërinjve nga fusha e diplomacisë, aktiviste të shoqatave të gruas dhe të arsimit, gra e burra që kanë krijuar identitetin e tyre profesional dhe kanë ndërtuar një jetë të mirë në Athinë, intelektualë, të rinj, dashurues të librit. U zhvillua si një bashkëbisedim për kulturën e librin shqip, u pyeta rreth sfidave të mia personale, profesionale si botuese dhe artistike si shkrimtare. Është e habitshme se si edhe me njerëz që takon për herë të parë, të gjesh aq pika të përbashkëta shpirtërore. Sa bukur është të shkëmbesh aq mirësi e humor dhe sa e rëndësishme është të krijohet kjo atmosferë nga ambasadorja, Zj. Luela Hajdaraga, të cilën e takova për herë të parë dhe më la mbresa aq të jashtëzakonshme për modestinë, ëmbëlsinë, autoritetin, sharmin dhe mënyrën si e transmetonte dashurinë për kulturën shqiptare. Më duhet të falënderoj mikun tim të veçantë dhe kolegun e letrave shqipe, Ag Apollonin, për fjalën që mbajti dhe analizën profesionale në lidhje me mesazhin estetik të artit në përgjithësi dhe timin në veçanti. Falënderoj mikun, shkrimtarin dhe përkthyesin e librit tim ‘Vrima’ në greqisht, Nikos Katsalidas. Falënderoj Eliverta Radomin për moderimin e veçantë, që e bëri bashkëbisedimin aq të këndshëm e provokues për të pranishmit. Falënderoj Ambasadorin e Kosovës në Athinë, Z. Fitim Gllareva, për praninë e tij në këtë aktivitet”, tha poetja e shkrimtarja Rita Petro. 

© Portali Shkollor- Të gjitha të drejtat e rezervuara. Ndalohet kopjimi pa lejen tonë.