Nxënësit e shkollës "Mihal Grameno" promovojnë marrëdhënie pozitive mes bashkëmoshatarëve përmes gjuhës shqipe

Në një kohë kur komunikimi mes të rinjve shpesh përshkohet nga fjalë të shkurtra, të papërshtatshme dhe ndikime të rrjeteve sociale, nxënësit e klasës IX-C të shkollës "Mihal Grameno", Tiranë, nisin një nismë frymëzuese për të forcuar marrëdhëniet pozitive mes bashkëmoshatarëve. Projekti, i quajtur "Marrëdhëniet mes bashkëmoshatarëve", synon që të rrisë ndërgjegjësimin për rëndësinë e gjuhës së përdorur dhe të krijojë një mjedis komunikimi respektues, mbështetës dhe përfshirës, si brenda klasës ashtu edhe online.

Nxënësit, nëpërmjet një faqeje ndërvepruese interneti https://mihalivezhgon.site/ , mundësojnë dërgimin e mesazheve pozitive dhe zhvillimin e aftësive për empati, mirëkuptim dhe dialog konstruktiv. Projekti kombinon kreativitetin e të rinjve me mbështetjen e ish-nxënësve profesionistë të fushës së TIK-ut dhe të prindërve, duke sjellë një shembull konkret të përdorimit të gjuhës për të ndërtuar marrëdhënie të shëndetshme.

Ky projekt ka mundur të realizohet falë përkushtimit të jashtëzakonshëm të grupit të punës që meriton duartrokitje: Alesia Shira, Altea Durma, Emma Kreshpa, Emili Kulla, Lora Kondi dhe Ejona Dervishi (R). Kontributi i tyre ka qenë kyç për krijimin e një produkti edukativ që frymëzon dhe ndryshon mënyrën se si komunikojnë bashkëmoshatarët.

Në një botë gjithnjë e më digjitale, ky botim fizik dhe projekti online i ofrojnë nxënësve mundësinë për t’u angazhuar në një aktivitet edukativ që mban gjallë vlerat e respektit, mirësjelljes dhe komunikimit të bukur, duke treguar se fuqia e fjalës mund të bashkojë, jo të ndajë.

Më poshtë mund të ndiqni projektin dhe prezantimin e tij në detaje.

PROJEKTI

PREZANTIMI I PROJEKTIT

Siç do ta shihni edhe vetë duke vizituar sajtin, por edhe duke u bërë pjesë e tij, nxënësit kanë nisur të dërgojnë mesazhe pozitive në faqen e projektit, duke ndarë përvoja dhe ndjenja që bëjnë shkollën një vend më të ngrohtë dhe miqësor. Disa mesazhe tregojnë gëzimin e të qeshurave në oborr, mbështetjen e shoqeve gjatë mungesave, vlerësimin për fjalët e ngrohta dhe kujdesin që duhet të tregojmë kur flasim me njëri-tjetrin. Tema e përbashkët është një frymë e fortë pozitive dhe inkurajuese: vetëm mirësjellje, respekt dhe buzëqeshje. :)