Mësuesi ndihmës dhe fëmijët me nevoja të veçanta

Nga Rajmonda Mullaymeri

Drejtuese e Rrjetit Profesional “Mësues ndihmës”, ZVAP Korçë

Roli i mësuesit ndihmës në klasat gjithëpërfshirëse është thelbësor në mbështetjen e fëmijëve me nevoja të veçanta. Kjo domosdoshmëri duhet të nënkuptojë përshtatjen e mësimdhënies bazuar në aftësitë dhe nevojat që kanë fëmijët me nevoja të veçanta. Që kjo përshtatje të ketë një bazë shkencore, ajo duhet të synojë para së gjithash përshtatjen e mësimdhënies, e cila është e pandashme nga përdorimi i PEI-t në mësimdhënie, dhe nevojën për ndihmë të asistuar nga mësuesi për nxënësit me nevoja të veçanta. Roli i mësuesit ndihmës ka të bëjë me bashkëpunimin me mësuesin e klasës, prindin, shërbimin psiko-social, dhe aktorë të tjerë për të mbështetur nxënësit me nevoja të veçanta.

Për të punuar me fëmijët me nevoja të veçanta, ju nevojitet shumë durim, përkushtim dhe profesionalizëm. Edukimi i fëmijëve dhe të rinjve me nevoja të veçanta është një profesion jashtëzakonisht i bukur, por shpesh edhe sfidues. Nëse kjo është një rrugë e re për ju, duhet të njiheni me rolet dhe përgjegjësitë e një mësuesi ndihmës.

Brenda këtij roli, ju do të përdorni njohuritë tuaja për mbështetjen e të nxënit, aftësitë e komunikimit dhe kreativitetin për të zhvilluar një qasje të larmishme duke i ndihmuar nxënësit me nevoja të veçanta të kuptojnë informacionin e paraqitur dhe duke i mbështetur ata gjatë gjithë arsimimit të tyre.

Arsimi gjithëpërfshirës është praktika e sigurimit që çdo nxënës, pavarësisht nga aftësitë, prejardhja ose rrethanat e tyre, të marrë arsim cilësor brenda shkollave të zakonshme. Ai promovon diversitetin, barazinë dhe respektin për të gjithë nxënësit.

Arsimi Gjithëpërfshirës kërkon : Përkushtim -Profesionalizëm - Bashkëpunim. Arsimi Gjithëpërfshirës nuk është një projekt apo proces që përfundon brenda një kohe të shkurtër. Ai është një proces ndryshimi dhe përmirësimi në zhvillim të vazhdueshëm. Arsimi Gjithëpërfshirës realizohet kur krijohen kushte të përshtatshme ku çdo nxënës, përfshirë edhe nxënësit me nevoja të veçanta zhvillojnë aftësitë e tyre, mësojnë, luajnë, përkrah bashkëmoshatarëve të tyre.

Arsimi gjithëpërfshirës përveç se është një e drejtë themelore ai lidhet me vlerat tona bazë siç janë: drejtësia, barazia, komuniteti, pjesëmarrja, dashuria, shpresa, respekti për diversitetin, guximi, bukuria, qëndrueshmëria, përkushtimi, besimi, mençuria, bashkëpunimi, të drejtat etj.

Për të pasur sukses si mësues ndihmës, do t'ju duhet të mbështeteni në njohuritë tuaja për nevojat shtesë të mësimit dhe të keni:

Një kuptim të mirë të Kurrikulës dhe përshtatjes së saj. Njohuri të metodave të ndryshme të mësimdhënies të përshtatshme për nxënësit me nevoja të veçanta.
Një kuptim të mirë të zhvillimit dhe të nxënit të fëmijëve. Demonstroni aftësi dëgjimi aktiv dhe aftësi të forta komunikimi verbal. Një përkushtim për të krijuar marrëdhënie pozitive me nxënësit dhe për të kuptuar nevojat e tyre. Aftësinë për të ofruar vëmendje individuale, siguri dhe mbështetje me detyrat e të nxënit. Gatishmëri dhe aftësi për t'u përshtatur në përgjigje të rrethanave në ndryshim. Monitorimin e përgjigjeve të nxënësve dhe përshtatjen për të arritur rezultatet e synuara të të nxënit.
Vetëbesimin për të vlerësuar nevojat e të nxënit dhe për të kërkuar në mënyrë aktive metoda të reja mësimdhënieje. Aftësinë për të trajtuar çështje komplekse dhe të ndjeshme me empati dhe mirëkuptim. Të jeni një anëtar mbështetës i ekipit(komisionit) të hartimit të PEI. Një interes në zhvillimin e progresit tuaj personal dhe profesional. Aftësia për të përdorur me kompetencë platforma digjitale/programe shtesë për ta bërë mësimin sa më tërheqës për nxënësit me nevoja të veçanta. Punoni me mësuesit kujdestarë, mësuesit e lëndëve të ndryshme , për të përshtatur planet dhe materialet e mësimit, për të përmbushur nevojat e ndryshme të nxënësve. Kjo mund të përfshijë ofrimin e udhëzimeve të thjeshtuara, ndihmave vizuale ose detyrave alternative.
Ofroni mbështetje të synuar për nxënësit që kanë nevojë për ndihmë shtesë gjatë mësimeve ose aktiviteteve.
Nxitni mbështetjen nga bashkëmoshatarët /puna në grupe, nxënësit me nevoja të veçanta me bashkëmoshatarët e tyre, duke krijuar një mjedis mbështetës të të nxënit. Mbani komunikim të hapur dhe të rregullt me mësuesit, prindërit dhe specialistë të tjerë të përfshirë në arsimimin e një nxënësi.
Merrni pjesë në takime dhe seanca trajnimi për të qëndruar të informuar rreth zhvillimeve më të fundit në arsimin gjithëpërfshirës.
Zbatoni strategji të menaxhimit të sjelljes që përqendrohen në përforcimin dhe ridrejtimin pozitiv në vend të masave ndëshkuese. Punoni ngushtë me mësuesit dhe specialistët për të zhvilluar dhe zbatuar plane ndërhyrjeje në sjellje kur është e nevojshme.
Inkurajoni nxënësit të zhvillojnë aftësi pavarësie dhe vetë-avokimi, duke ulur gradualisht nivelin e mbështetjes sipas nevojës. Jini një avokat për praktikat gjithëpërfshirëse brenda shkollës suaj, duke promovuar ndërgjegjësimin dhe kuptimin e përfitimeve të diversitetit dhe përfshirjes.

Detyrat dhe Përgjegjësitë e mësuesit ndihmës

Bashkëpunoni me mësuesit kujdestarë, mësuesit e lëndëve të ndryshme, profesionistë, prindin, shërbimin psiko-social për të zbatuar plane arsimore të individualizuara (PEI) dhe për të modifikuar materialet mësimore sipas nevojës.

Përdorimin e njohurive të kurrikulës së përgjithshme dhe asaj të arsimit special për të individualizuar të nxënit për fëmijët me nevoja të veçanta. Përdorni metoda të ndryshme vlerësimi për arritjet e fëmijëve me nevoja të veçanta. Ofroni mbështetje individuale ose në grupe të vogla për nxënësit me nevoja të veçanta në lëndë dhe aktivitete të ndryshme akademike.

Ndihmoni nxënësit në përfundimin e detyrave. Përfshijini nxënësit me nevoja të veçanta në veprimtari ,projekte dhe aktivitete si brenda klasës,shkollës dhe jashtë saj. Monitoroni dhe dokumentoni progresin dhe sjelljen e nxënësve, duke i raportuar ato. Ndihmoni nxënësit me detyrat e kujdesit personal, lëvizshmërinë dhe aktivitete të tjera të jetës së përditshme, sipas nevojës.

Mbështetni nxënësit në zhvillimin e aftësive të pavarësisë dhe vetë-avokatisë. Zbatoni strategji mbështetëse të sjelljes pozitive për të adresuar dhe menaxhuar sjelljet sfiduese.

Ndihmoni në krijimin dhe mirëmbajtjen e një mjedisi të sigurt dhe të organizuar në klasë. Arsimi gjithëpërfshirës nuk është thjesht një fjalë kyçe; është një angazhim themelor për të ofruar arsim cilësor për të gjithë. Mësuesit ndihmës janë heronjtë e panjohur që ndihmojnë në kapërcimin e hendekut midis nevojave të ndryshme të nxënësve dhe praktikave gjithëpërfshirëse në klasë. Duke zbatuar këto strategji dhe duke nxitur një kulturë përfshirjeje, mësuesit ndihmës mund të kenë një ndikim të rëndësishëm në jetën e nxënësve me nevoja të veçanta, duke siguruar që ata të kenë mbështetjen dhe mundësitë që meritojnë. Së bashku, ne mund të krijojmë klasa ku çdo nxënës lulëzon dhe mëson. Puna me fëmijët me nevoja të veçanta na kujtojnë se këta fëmijë të jashtëzakonshëm janë unikë, të aftë dhe të mbushur me potencial, dhe prindërit e tyre janë luftëtarë të sfidave, të dashurisë dhe këmbënguljes për fëmijët e tyre. "Përqafoni ndryshimet; ato e bëjnë botën më të bukur."

“Jam e lumtur që punoj në këtë profesion dhe do vazhdoj të jap kontributin tim për një gjithëpërfshirje sa më cilësore”.