Përtej notave: Roli i edukimit socio-emocional në suksesin e nxënësve

A mjaftojnë notat e larta për të qenë i suksesshëm në shkollë dhe në jetë? Edukimi socio-emocional i mëson nxënësit të kuptojnë veten, të menaxhojnë stresin, të bashkëpunojnë dhe të marrin vendime të përgjegjshme. Një shkollë e mirë përgatit jo vetëm për provimet, por edhe për jetën.

Nga Parajsa Shtini

A mjafton të jesh një nxënës i mirë vetëm duke marrë nota të larta?

Në realitetin e sotëm arsimor, përgjigjja është gjithnjë e më shumë: jo.Arsimi i shekullit XXI kërkon një qasje shumëdimensionale, e cila shkon përtej transmetimit të njohurive akademike. Ndërsa sistemet tradicionale të arsimit janë përqendruar prej kohësh në lëndë të tilla si matematika, shkencat dhe gjuhët, shpesh është lënë në plan të dytë zhvillimi emocional dhe social i nxënësve.

Si rezultat, një nxënës mund të arrijë rezultate të mira akademike, por njëkohësisht të ketë vështirësi me motivimin, menaxhimin e stresit, përfshirjen në procesin mësimor apo marrëdhëniet me të tjerët.Pikërisht këtu merr rëndësi edukimi socio-emocional, i cili synon të zhvillojë kompetenca thelbësore si ndërgjegjësimi emocional, vetërregullimi, empatia dhe bashkëpunimi. Këto aftësi janë të rëndësishme jo vetëm për suksesin akademik, por edhe për zhvillimin personal dhe përgatitjen e nxënësve për jetën.

• Vetëdija – aftësia për të kuptuar emocionet, mendimet dhe vlerat personale;

• Vetëmenaxhimi – aftësia për të kontrolluar emocionet dhe sjelljen dhe për të menaxhuar stresin;

• Ndërgjegjësimi social – aftësia për të kuptuar këndvështrimet dhe emocionet e të tjerëve;

• Aftësitë e marrëdhënieve – aftësia për të krijuar dhe ruajtur marrëdhënie të shëndetshme dhe bashkëpunuese;

• Marrja e përgjegjshme e vendimeve – aftësia për të marrë vendime të menduara dhe të përgjegjshme.

Pse është e rëndësishme kjo për shkollat shqiptare?

Rëndësia e të nxënit socio-emocional është veçanërisht e dukshme në kontekstin e Ballkanit dhe, në mënyrë të veçantë, në shkollat e mesme shqiptare.Sistemet arsimore në këtë rajon i kushtojnë rëndësi të madhe arritjeve akademike, provimeve dhe testimeve të standardizuara. Sigurisht, përvetësimi i njohurive është një element themelor i arsimit. Megjithatë, përqendrimi i madh te rezultatet akademike mund të krijojë edhe nivele të larta të presionit mbi nxënësit.

Presioni akademik mund të ndikojë në motivimin, mirëqenien emocionale dhe përfshirjen e tyre në procesin mësimor. Për disa nxënës, periudhat e provimeve, ngarkesa e detyrave dhe pritshmëritë për rezultate të larta mund të shoqërohen me stres dhe pasiguri.

Integrimi i të nxënit socio-emocional ofron një qasje më të ekuilibruar ndaj arsimit. Ai i ndihmon nxënësit të menaxhojnë stresin, të bashkëpunojnë në mënyrë efektive dhe të ruajnë motivimin edhe gjatë periudhave më të vështira akademike.

Shkolla nuk duhet të përgatisë vetëm për provimet

Përfshirja e strategjive socio-emocionale në mësimdhënien e përditshme mund t'i ndihmojë shkollat shqiptare të krijojnë nxënës më të motivuar, më të qëndrueshëm përballë vështirësive, më bashkëpunues dhe më të suksesshëm në aspektin akademik.

Por rëndësia e këtyre aftësive shkon shumë përtej notave dhe provimeve.

Edukimi socio-emocional i pajis nxënësit jo vetëm me aftësitë që u nevojiten për të pasur sukses në shkollë, por edhe me kompetenca të rëndësishme për të nxënit gjatë gjithë jetës, qytetarinë e përgjegjshme, marrëdhëniet me të tjerët dhe zhvillimin personal.

Në fund të fundit, një shkollë e suksesshme nuk duhet të pyesë vetëm: “Sa di nxënësi?”

Duhet të pyesë edhe:“A di të kuptojë veten? A di të përballojë vështirësitë? A di të bashkëpunojë me të tjerët? A di të marrë vendime të përgjegjshme?”

Sepse një arsim i mirë nuk përgatit vetëm nxënës që dinë të japin përgjigjet e duhura në një provim. Ai përgatit individë të aftë për të përballuar jetën, për të bashkëpunuar me të tjerët dhe për të vazhduar të mësojnë gjatë gjithë jetës.