648,6 milionë euro për arsimin/ Kumbaro: Nga viti 2026 nis rritja e pagave të mësuesve me 36 mijë lekë në vit

Ministrja e Arsimit, Mirela Kumbaro, prezantoi sot në Komisionin për Ekonominë, Punësimin dhe Financat, projektbuxhetin e arsimit për vitin 2026, më i larti ndonjëherë në vlerë nominale, planifikuar në shumën 64 miliardë e 865 milionë lekëve me një shtesë prej 2 miliardë e 846 milionë lekë nga buxheti fillestar i vitit 2025.

Kumbaro tha se projektbuxheti për vitin 2026 konsolidon rritjen e pagave, uljen e pabarazive, përmirësimin e infrastrukturës dhe cilësisë arsimore, si dhe forcon rolin e arsimit të lartë dhe kërkimit shkencor në zhvillimin kombëtar të vendit.

“Projektbuxheti i vitit 2026 për Ministrinë e Arsimit është planifikuar në shumën 64 miliardë e 865 milionë lekë ose 648,6 milionë euro, me një shtesë prej 2 miliardë e 845 milionë lekësh (28,4 milionë euro) ndaj buxhetit fillestar të vitit 2025 ose një rritje prej 4,6% më shumë se buxheti fillestar i vitit 2025. Ky është buxheti më i lartë historik nominal për arsimin. Por është e rëndësishme të themi se Sektori i Arsimit mbështetet edhe nga aktorë të tjerë, duke e rritur ndjeshëm financimin real. Në total, këto fonde të injektuara së bashku me buxhetin e Ministrisë së Arsimit për vitin 2026 arrijnë vlerën rreth 90 miliardë lekë ose mbi 900 milionë euro, duke e rritur peshën e sektorit në: 10.1% të shpenzimeve publike. Buxheti për Arsimin mbështetet gjithashtu edhe me investimet kapitale në fondin 54,5 milionë eurosh, ku do të vijojë mbështetja për investimet në infrastrukturën e arsimit bazë, Arsimit të Mesëm të Lartë dhe Arsimit të Lartë Publik, si dhe mbështetja për infrastrukturën e kërkimit shkencor”, theksoi ministrja Kumbaro.

"Buxheti i Ministrisë së Arsimit për vitin 2026 ndahet në 5 programe buxhetore, ku në Arsimin Parauniversitar do të financohen 425 milionë euro paga, 37.3 milionë euro shpenzime korente siç janë ato për transport, për bursa dhe kuotë ushqimore, tekstet falas, hartimin e programeve dhe rishikimin e kurrikulave, trajnimin e mësuesve, programet passhkollore, mbështetjen për tekstet e diasporës dhe qendrat burimore e shkollat me status të veçantë, etj. Nga viti 2026 nis një rritje e re pagash për mësuesit prej 36.000 lekësh në vit".

Kumbaro deklaroi se arsimi i lartë dhe kërkimi shkencor për vitin 2026 do të financohen në vlerën totale 146 milionë euro.

“Për vitin 2026, programi i arsimit të lartë dhe programi i shkencës financohen në vlerën totale 146 milionë euro, të cilat së bashku me të ardhurat e vetë universiteteve publike arrijnë vlerën 185 milionë euro që do të ndahen fonde 'grante të mësimdhënies' dhe mbështetje financiare për studentët dhe fonde për kërkimin shkencor dhe ndërkombëtarizimin e arsimit të lartë. Për vitin 2026, në fondin e investimeve për përmirësimin e infrastrukturës së IAL-ve publike dhe kërkimin shkencor janë parashikuar 18,3 milionë euro. Nga ky fond i parashikuar do të financohen me përparësi projektet për rindërtimin e godinës së Fakutletit të Inxhinierisë së Ndërtimit, rikonstruksionin e ndërtesës së fakultetit të Gjeologji-Miniera dhe ndërtimin e muzeut të gjeologjisë, financimi i projektit 'Ndërtimi i godinës së Fakultetit të Studimeve Profesionale' Universiteti 'Aleksandër Moisiu', Durrës, ndërtimi i fushës së futbollit dhe pistës së atletikës së Universitetit të Sporteve, ndërtimi i godinës së Fakultetit të Shkencave Mjekësore Teknike të Universitetit 'Alekasndër Xhuvani', Elbasan, si dhe investimi i 40 projekteve të infrastrukturës së kërkimit shkencor në IAL-të publike me vlerë 3,5 milionë euro", tha ministrja.

Në fund të fjalës së saj, ministrja Kumbaro u shpreh se ky buxhet nuk është vetëm një program financiar, por është një plan për të ardhmen që pasqyron qartë prioritetin për arsimin si themel të zhvillimit ekonomik, social dhe kulturor të vendit.

© Portali Shkollor - Të gjitha të drejtat e rezervuara. Ndalohet kopjimi pa lejen tonë