Datat e provimeve për klasat e 9-ta

Brenda muajit qershor, nxënësit e klasave të 9-ta do t’u nënshtrohen tri provimeve kombëtare, ku përfshihen provimet në lëndët Gjuhë Shqipe, Matematikë dhe Gjuhë e huaj.

Sipas udhëzimit të miratur, nxënësit do të japin provimin e parë të detyruar në lëndën e Gjuhës Shqipe më datë 19 qershor 2025. Ndërkaq, më 25 qershor nxënësit do t’i nështrohen provimit të dytë në lëndën e Matematikës. Prova e fundit do të jetë testi i Gjuhës së Huaj, që do të mbahet më datën 30 qershor 2025.

Nxënësit e pakicave kombëtare zhvillojnë edhe provimin kombëtar të arsimit bazë në lëndën Gjuhë Amtare, ku do të testohen në datën 20 qershor 2025. Gjithashtu, nxënësit e pakicave kombëtare vlerësohen në lëndët: Gjuhë amtare, Gjuhë shqipe, Matematikë dhe sipas dëshirës edhe në një gjuhë të huaj.

Ndërkohë, gjuhët e huaja që do të jepen si provim i detyruar  janë: Anglisht, Frëngjisht, Italisht dhe Gjermanisht. Nxënësit e klasave të 9- ta të shkollave mbështetëse të seksioneve dygjuhëshe franceze, italiane dhe gjermane japin provim gjuhën përkatëse të seksionit në nivelin gjuhësor A2.

Ndërsa, nxënësit me aftësi të kufizuar që ndjekin shkollat e zakonshme i zhvillojnë   provimet kombëtare  të  arsimit  bazë, sipas  përcaktimev në rregulloren për zhvillimin e provimeve kombëtare të arsimit bazë. Drejtuesi  i  Institutit  të  nxënësve  që  nuk shikojnë e tërheq  testin në Qendrën e Shërbimeve Arsimore (QSHA), një ditë para  zhvillimit  të  provimit dhe e kthen  atë  në sistemin e shkrimit brail.

Çdo provim do të fillojë në orën 10:00 dhe do të zgjasë 2 orë e 30 minuta.

© Portali Shkollor- Të gjitha të drejtat e rezervuara. Ndalohet kopjimi pa lejen tonë.