Viti shkollor 2020-2021

Ministrja Shahini ndan urim për vitin e ri shkollor: Domosdoshmëri respektimi i protokolleve shëndetësore

Ministrja e Arsimit, Sportit dhe Rinisë Besa Shahini, nëpërmjet një video-mesazhi ka përcjellë urimin e saj për vitin e ri shkollor 2020-2021, ndërsa nënvizon edhe masat e ndërmarra për të siguruar një fillim sa më të mbarë të tij.

"Nxënës të dashur! Nesër do të uleni në bankat e shkollës përsëri për të filluar vitin e ri shkollor 2020-2021. Kjo është një ditë e madhe dhe e rëndësishme për ju, ndaj jemi përkujdesur me stafet e shkollave, mësuesit tuaj, drejtorët e shkollave, si dhe të gjithë institucionet përgjegjëse për të siguruar një fillim sa më të mbarë për vitin e ri shkollor", kështu është shprehur këtë mbrëmje Ministrja e Arsimit, Sportit dhe Rinisë Besa Shahini, nëpërmjet një video-mesazhi ku përcjellë urimin e saj për vitin e ri shkollor 2020-2021, teksa apelon për respektimin e protokolleve:

"E di që do e keni shumë të vështirë të ndiqni protokollet e sigurisë së shëndetit që kemi vendosur në shkollat tuaja, por kjo është e domosdoshme në mënyrë që të minimizojmë përhapjen e koronavirusit në shkollë, i cili është ende mes nesh, dhe në mënyrë që të qëndrojmë sa më gjatë në shkollë".


Në rast se duhet të mbyllet ndonjë klasë apo ndonjë shkollë për shkak të infektimeve, Ministrja Shahini cilëson se "do të mbështetemi tek plani B, që është kanali "RTSH Shkollë", ku i kemi të xhiruara të gjitha leksionet që do t'i zhvilloni edhe në shkollë me mësuesit tuaj, dhe kemi edhe platformën online që do të shërbejë për mësim në kushte shtëpie".


Në fund, duke sjellë në vëmendje se në ambientet e brendshme të shkollës janë të afishuara edhe rregullat për t'u ndjekur gjatë mësimit e qëndrimit në shkollë, Ministrja Shahini uron shumë suksese e mbarësi në vitin e ri shkollor 2020-2021.

Kaltra Tafani

© Portali Shkollor- Të gjitha të drejtat e rezervuara. Ndalohet kopjimi pa lejen tonë.

1,504 Lexime
3 vjet më parë