Nis testimi i informatizuar i kualifikimit të mësuesve, ja kalendari dhe listat e pjesëmarrësve

Ka nisur testimi i informatizuar i kualifikimit të mësuesve për vitin shkollor 2025-2026, i organizuar nga Qendra e Shërbimeve Arsimore. Procesi përfshin mësuesit që synojnë titujt “Mësues i Kualifikuar”, “Specialist” dhe “Mjeshtër”, duke ndikuar në zhvillimin profesional dhe në rritjen e cilësisë së arsimit.

Ka nisur sot testimi i informatizuar i Kualifikimit të Mësuesve, proces që po zhvillohet nga Qendra e Shërbimeve Arsimore, sipas një kalendari të përcaktuar për kategorinë “Mësues i Kualifikuar”.

Procesi i kualifikimit po zhvillohet për të gjithë mësuesit që synojnë avancimin në karrierën e tyre profesionale, për titujt “Mësues i Kualifikuar”, “Mësues Specialist” dhe “Mësues Mjeshtër”.

Ky vlerësim konsiderohet një hap i rëndësishëm jo vetëm për zhvillimin profesional të mësuesve, por edhe për përmirësimin e cilësisë së mësimdhënies dhe forcimin e standardeve në arsimin parauniversitar.

Sipas njoftimit zyrtar të Ministria e Arsimit dhe Sportit dhe Qendra e Shërbimeve Arsimore, testimi i informatizuar për vitin shkollor 2025-2026 zhvillohet në zbatim të Udhëzimit nr. 17, datë 22.07.2024 “Për kriteret dhe procedurat e kualifikimit të punonjësve arsimorë”, i ndryshuar.

Testimi po zhvillohet në ambientet e Qendrës së Shërbimeve Arsimore në Tiranë, në adresën Bulevardi “Zhan D’Ark”, nr. 23 (ish-ATSH).

Rregullat që duhet të respektojnë kandidatët

Ditën e testimit, mësuesit pjesëmarrës duhet të kenë parasysh disa rregulla të rëndësishme:

të jenë të pajisur me dokument identifikimi origjinal (kartë identiteti ose pasaportë);
të paraqiten të paktën 30 minuta përpara fillimit të testimit;
të mos mbajnë apo përdorin celularë dhe pajisje të tjera komunikimi gjatë testimit, pasi kjo përbën kriter për moskualifikim;
të mos pinë duhan dhe të mos konsumojnë ushqime në mjediset e testimit;
të mos komunikojnë me njëri-tjetrin gjatë zhvillimit të provimit.

Për më shumë informacion, më poshtë mund të gjeni kalendarin e organizimit të testimit dhe listat emërore të kandidatëve.