Nxënësit nga Kukësi-Veliajt: Na merr në juridiksion!

Një letër e pazakontë ka mbërritur në adresën e kryetarit të bashkisë së Tiranës Erion Veliaj. Letra është dërguar nga mësuesit dhe nxënësit e shkollës në fshatin Morinë të Bashkisë së Kukësit.

Letra e plotë:

Drejtuar: Kryetarit të Bashkisë Tiranë, z. Erion Veliaj

“Jemi një kolektiv i vogël mësues-nxënës në fshatin Morinë të Bashkisë Kukës, pikërisht aty ku bëhet prezantimi i parë i vendit tonë me Kosovën dhe me rajonin. Po bëjmë përpjekje të mira për rritjen e cilësisë së punës mësimore dhe edukative. Kemi parë e dëgjuar për ndryshimet e thella dhe impresionuese që keni bërë e po bëni për ditë në Bashkinë tuaj, të cilat janë tepër inkurajuese gjatë këtij viti të qeverisjes suaj. Ndaj ju përshëndesim dhe ju urojmë suksese të tjera.

Ndërsa tek ne ndodh e kundërta. Kemi një objekt shkollor të amortizuar skajshëm, me tavolina, stola e karrike të vjetëruara, për të cilat na vjen turp të përdoren nga nxënësit dhe mësuesit. Mungojnë gjërat elementare për zhvillimin normal të mësimit, gjë që ndikon negativisht në edukimin e nxënësve.

Kemi bërë përpjekje me banorët e fshatit dhe me disa firma ndërtimi, ju kemi kërkuar ndihmën e institucioneve, por nuk na është ofruar ndihma e nevojshme.

Ju lutemi, konsiderojeni shkollën tonë si pjesë të juridiksionit tuaj!

Besojmë shumë tek ndihma juaj.

Ju urojmë suksese!

Për kolektivin mësues-nxënës të shkollës 9-vjeçare Morinë, Kukës”.

Mësuesit dhe nxënësit e këtij fshati e kanë parë si një mundësi ndihmën nga kryebashkiaku i Tiranës, prandaj dhe i dërguan një letër. 

Ky veprim tregon se sa shumë e duan arsimin mësuesit dhe nxënësit. Ata janë të gatshëm të bëjnë çdo gjë vetëm të mos mbeten të paarsimuar.

Letra u publikua nga “Shqiptarja.com”.