Prof. As. Dr. Teuta Toska: Shkollat po ngulisin gabime drejtshkrimore në fasadat e tyre

Studiuesja dhe gjuhëtarja Teuta Toska ka reaguar publikisht në lidhje me mënyrën se si shkruhen emërtimet në fasadat e shkollave në vend, duke theksuar se shpesh aty gjenden gabime drejtshkrimore që më pas rrezikojnë të përcillen si model për nxënësit.

Shkas për reagimin e saj u bë shkrimi në një shkollë në të cilin mungonte vizë lidhëse mes numrit dhe fjalës, duke u vendosur “9 vjeçare’ në vend të formës së saktë “9-vjeçare”.

“Rregulli i Drejtshkrimit e do që kur bashkohet numër e shkronja për të bërë një fjalë, të lidhen me një vizë. Në këtë rast duhet ‘9-vjeçare’. Kjo gjë duhet ndryshuar sa më shpejt, përpara se nxënësit ta ngulisin në kokë gabimin drejtshkrimor”, shkruan Toska, duke e shoqëruar reagimin me tone ironike.

Sipas saj, ky nuk është një problem i thjeshtë, pasi mungesa e korrektësisë në gjuhën shqipe në fasadat e shkollave tregon shpërfillje nga një sërë hallkash të përfshira në ndërtimin apo rikonstruktimin e institucioneve arsimore, nga arkitektët dhe inxhinierët, te zyrat arsimore e bashkitë.

“Nëse do të ishte në një institucion tjetër publik, nuk do të këmbëngulja kaq shumë. Por është mu aty, në ballë të vendit ku mendohet se mësohet drejtshkrimi i shqipes... U shkon kot puna mësuesve të gjuhës”, thekson ajo.

Toska shton se kjo situatë dëmton seriozitetin e shkollës dhe çon në ngulitjen e formave të gabuara të shkrimit te fëmijët.

“Shkurt, po lini nam që të gjithë! T’i gëzoni shkollat!”, përfundon reagimin e saj gjuhëtarja.

(Shënim: Më poshtë disa nga shkollat ku janë vërejtur këto gabime)

© Portali Shkollor - Të gjitha të drejtat e rezervuara. Ndalohet kopjimi pa lejen tonë.